Ўзбекистон, Тошкент - Batafsil.uz. АҚШ бошчилигидаги халқаро коалиция кучлари шахсий таркиби ва ҳарбий техникаси Эрбил авиабазасидан олиб чиқилгач, Ироқда ИШИД террорчилик гуруҳига қарши ўтказилган Operation Inherent Resolve ҳарбий миссияси муваффақиятли якунланганини эълон қилди.
Баёнотда таъкидланишича, ушбу тарихий босқич жангариларни Ироқда ва бутун минтақада уюшган ҳарбий таҳдид сифатида тор-мор этиш бўйича 12 йиллик кампаниянинг муваффақиятини акс эттиради.
Бундан буён хавфсизликни таъминлаш ҳаракатлари бевосита Ироқ томонидан бошқарилади ҳамда икки томонлама нормал муносабатлар билан қўллаб-қувватланади.
Маълумот учун, мазкур операция 2014 йилнинг август ойида ИШИД томонидан Ироқ ва Суриянинг катта ҳудудлари эгаллаб олинганидан сўнг бошланган бўлиб, унда АҚШ, Буюк Британия, Канада, Франция ва бошқа иттифоқчи мамлакатлар иштирок этган.
Гуруҳнинг Ироқдаги ҳудудий назорати 2017 йилнинг охирига келиб тугатилган бўлса-да, халқаро коалиция унинг қолган ячейкаларига қарши курашни давом эттириб келаётган эди.
Жорий йилнинг июль ойида Вашингтон ва Бағдод ўртасида эришилган келишувга асосан, 30 сентябрь куни ҳарбий операциялар узил-кесил якунланган.
Олдинроқ Покистон пойтахти Исломободдаги "Хадижат-ул Кубро" шиалар масжидида ИШИД томонидан жума намози пайтида содир этилган мудҳиш террорчилик ҳаракати оқибатида ҳалок бўлганлар сони ортиб, 31 нафарни ташкил этганди ва 169 киши жароҳатланганди.
Изоҳлар мавжуд емас