Ўзбекистон, Тошкент - Batafsil.uz. Покистон пойтахти Исломободдаги "Хадижат-ул Кубро" шиалар масжидида жума намози пайтида содир этилган мудҳиш террорчилик ҳаракати оқибатида ҳалок бўлганлар сони ортиб, 31 нафарни ташкил этмоқда, 169 киши жароҳатланган. Мазкур қонли воқеа учун жавобгарликни "Исломий давлат" (ИШИД) террорчилик гуруҳи ўз зиммасига олди.
Эслатиб ўтамиз, 6 февраль куни Исломободнинг Тарлай-Калан туманида юз берган портлаш сўнгги йилларда Покистон пойтахтида содир этилган энг йирик террорчилик ҳаракатларидан бири бўлди. Кеча ушбу ҳужум натижасида 10 киши ҳалок бўлгани ҳақида маълум қилган эдик.
Дастлабки суриштирув натижаларига кўра, ҳудкуш-террорчи масжид дарвозаси олдида қўриқчилар томонидан тўхтатилган, шундан сўнг у ўқотар қуролдан ўт очиб, ўзини портлатиб юборган.
Покистон Мудофаа вазири Хожа Осифнинг маълум қилишича, террорчи Пешовар шаҳридан бўлган 32 ёшли шахсдир. Унинг Афғонистонга бир неча бор сафар қилгани аниқланган.
Покистон расмийлари ҳужум ортида хорижий кучлар ва Афғонистон ҳудудидаги террорчилик лагерлари турган бўлиши мумкинлигини даъво қилмоқда.
Ўзбекистон Президенти Шавкат Мирзиёев ушбу фожиа Покистонга ташрифи якунланган вақтга тўғри келганига қарамай, зудлик билан Покистон Президенти ва Бош вазирига таъзия мактубини йўллади. Давлатимиз раҳбари террорчилик ҳаракатини кескин қоралаб, ҳалок бўлганларнинг оилаларига ҳамдардлик билдирди.
Покистон Президенти Асиф Али Зардорий ушбу ҳужумни "инсониятга қарши жиноят" деб атаган. Ҳозирда шаҳар шифохоналарида фавқулодда ҳолат жорий этилган, хавфсизлик чоралари эса максимал даражага кўтарилган.
Изоҳлар мавжуд емас