Ўзбекистон, Тошкент - Batafsil.uz. АҚШ Яқин Шарқдаги Эронга яқин сув ҳавзаларига USS Theodore Roosevelt бошчилигидаги учинчи авиаташувчи зарба берувчи гуруҳни ҳамда минглаб қўшимча ҳарбийларни жойлаштирмоқда. Мазкур қарор ноябрь ойида ўтказиладиган оралиқ сайловлар арафасида ва Эрон билан низонинг саккизинчи ойида Президент Дональд Трамп учун ҳарбий вариантларни тайёр тутиш мақсадида қабул қилинган.
Хорижий нашрларнинг хабар беришича, янги сафарбарлик жами 9 000 дан 10 000 нафаргача америкалик ҳарбийни, жумладан 2 000 дан ортиқ денгиз пиёдаларини ўз ичига олган денгиз экспедиция бўлинмасини (MEU) қамраб олади.
Ноябрь ойи охирига келиб минтақада учта авиаташувчи ҳамда иккита амфибия қўниш гуруҳи жойлаштирилади.
F-35 қирувчи самолётларини ўз ичига олувчи ушбу янги кучлар минтақада аллақачон бўлиб турган 50 000 нафарлик АҚШ ҳарбий контингентини янада кучайтиради.
Пентагон ва АҚШ Мудофаа вазири Пит Ҳегсетнинг таъкидлашича, дипломатик музокараларнинг ривожланишидан қатъи назар, давлат раҳбарининг ҳар қандай янги буйруғини бажариш учун ҳарбий кучлар тўлиқ шай ҳолатга келтирилмоқда.
Аввалроқ АҚШ Мудофаа вазирлигининг шахсий таркибга оид маълумотлар базасига рухсатсиз кириш оқибатида 2,76 миллион нафар тирик ва 294 минг нафар вафот этган шахсга тегишли маълумотлар фош бўлганди.
Яқинда АҚШ ва Эрон вакиллари июнь ойи охиридан бери илк бор Нью-Йоркда музокара ўтказганди. Учрашув БМТ Бош ассамблеяси доирасида бўлиб ўтган, АҚШ президенти Дональд Трамп эса Теҳрон билан келишувга 3 ноябрь куни АҚШ Конгрессига бўлиб ўтадиган оралиқ сайловлардан кейин эришиш мумкинлигини айтган эди.
Изоҳлар мавжуд емас