АҚШ президенти Дональд Трамп Эронга қарши ҳарбий амалиёт эълон қилди

Ўзбекистон, Тошкент - Batafsil.uz. АҚШ президенти Дональд Трамп Эрон исломий режимининг ядровий қуролга эга бўлишига йўл қўймаслик ва мамлакатнинг ракета саноатини йўқ қилиш мақсадида кенг кўламли ҳарбий амалиёт бошланганини расман эълон қилди. Трампнинг қайд этишича, ушбу қарор АҚШнинг миллий хавфсизлигини таъминлаш ва минтақадаги беқарорликка чек қўйиш учун қабул қилинган. 

Аввалроқ Исроил Эронга қарши "Яҳуд қалқони" номли ҳарбий амалиёт бошлаганини эълон қилганди.  Исроил расмийлари ушбу зарбалар АҚШ билан ҳамкорликда амалга оширилганини билдирган бўлса-да, АҚШ Марказий қўмондонлиги бу борада расмий изоҳ беришдан бош тортган эди. 

Трамп Эрон ҳеч қачон ядровий қуролга эга бўлмаслигини таъкидлаб, бу борада АҚШнинг позицияси қатъий эканини билдирган.  Шунингдек, Эроннинг ракета салоҳиятини бутунлай ер билан яксон қилишни мақсад қилганини айтган. 

АҚШ армияси Эрон флотини йўқ қилиш ва террорчилик гуруҳларининг таъсирини тўхтатишга тайёрланмоқда. 

Президент АҚШ ҳарбийларининг куч-қудрати дунёда тенгсиз эканини таъкидлаб, ҳарбий амалиётда йўқотишлар бўлиши мумкинлигини тан олган. Шу билан бирга, у буни "келажак учун нодир ва муҳим миссия" деб атаган. 

Шу билан бирга Трамп Эрон Ислом инқилоби посбонлари корпуси ва бошқа ҳарбий тузилмаларни қуролларни ташлашга чақирган: "Қуролларингизни ташланг ва тўлиқ дахлсизликка эга бўлинг ёки муқаррар ўлимга юз тутинг". 

У Эрон халқига мурожаат қилиб, уларни хавфсиз жойда қолишга ва кўчага чиқмасликка чақирган: 

"Ташқарида жуда хавфли, бомбалар ҳар ерга ташланади. Биз ишни тугатганимиздан сўнг, ҳукуматни ўз қўлингизга олинг. Бу сизга авлодлар давомида келадиган ягона имконият бўлиши мумкин". 

Трамп амалиёт АҚШнинг Эрон халқига озодлик олиб келиш йўлидаги қатъияти эканини таъкидлаб, ҳозирги вақт ҳаракат қилиш учун энг муҳим палла эканини қўшимча қилган. 

Эслатиб ўтамиз, бугун, 28 феваль куни Исроил давлати Теҳрон шаҳридаги Эрон олий раҳнамоси оятуллоҳ Али Хоминаий қароргоҳи яқинида ҳаво зарбаларини амалга оширди. Исроил мудофаа вазири Исроил Кац ушбу амалиёт мамлакатга бўлган таҳдидларни бартараф этишга қаратилган "олдиндан берилган зарба" эканини билдирди ва бутун Исроил ҳудудида фавқулодда ҳолат жорий этилди.