Ўзбекистон, Тошкент - Batafsil.uz. АҚШ Президенти Дональд Трамп мамлакат мудофаа харажатларини тарихий даражага — 1,5 триллион долларга кўтариш бўйича якуний қарорини эълон қилди. Ушбу қарор нафақат Америка ички сиёсатида, балки глобал геополитикада янги давр бошланганидан дарак бермоқда.
Президент Трамп Конгресс ва Сенат вакиллари билан ўтказилган мураккаб музокаралардан сўнг, 2027 йилги ҳарбий бюджетни 1 триллион эмас, балки 1,5 триллион доллар этиб белгилаган. Унинг таъкидлашича, бу маблағ Америкага "ҳар қандай душмандан устун бўлиш" ва энг замонавий қуролли кучларни яратиш имконини беради.
Бу рекорд даражадаги харажатларни молиялаштириш манбаи сифатида Трамп бошқа давлатлардан ундирилаётган улкан божхона тўловларини кўрсатган. Унинг фикрича, илгари АҚШни "талаб келган" давлатлар эндиликда Америка армиясининг қудрати учун пул тўламоқда.
1,5 триллион доллар — бу дунёдаги энг йирик ўнта армиянинг жами бюджетидан ҳам кўп демакдир. Бундай молиявий куч АҚШга дунёнинг исталган нуқтасида бир вақтнинг ўзида бир нечта ҳарбий амалиётларни ўтказиш имконини беради.
Таниқли журналист Такер Карлсон ушбу бюджет ўсишини ва Венесуэладаги сўнгги ҳарбий амалиётни таҳлил қилар экан, кескин хулоса чиқарган: АҚШ демократик республикадан глобал империяга айланиб бўлди.
Карлсоннинг фикрича, бу бюджет шунчаки мудофаа эмас, балки дунё устидан мутлақ ҳукмронлик қилишга қаратилган режадир.
Карлсон АҚШнинг Венесуэлага ҳужумини ва президент Мадуронинг ўғирлаб кетилишини классик империалистик ҳаракат деб атади. "Агар сиз исталган давлатга бостириб кириб, унинг раҳбарини олиб чиқиб кета олсангиз, сиз энди қонун устувор бўлган республика эмассиз",- деб таъкидлаган у.
Бу классик империалистик моделдир: бошқа давлатлардан олинаётган маблағлар (божлар) ҳисобига дунёдаги энг қудратли армияни сақлаш. Бу армия эса, ўз навбатида, АҚШга иқтисодий шартларни давлатлар олдига куйишда давом этиш учун хизмат қилади.
"Бундай бюджет глобал ёки минтақавий урушга тайёргарлик кўраётган мамлакатга хосдир... шубҳасиз, биз шу йўналишда, жаҳон уруши томон бормоқдамиз", деб ёзган Карлсон.
Трампнинг "ватанпарварларга дивиденд тўлаш" ваъдаси — халқни бўлажак ҳарбий кампаниялар ва юқори ҳарбий харажатларни қўллаб-қувватлашга йўналтирилган ижтимоий манёврдир.
Такер Карлсоннинг таҳлиллари ва Трампнинг реал ҳаракатлари бир нуқтада бирлашмоқда: АҚШ энди фақат ўз чегараларини ҳимоя қилувчи давлат эмас, балки триллионлаб долларлик бюджет ва замонавий технологиялар ёрдамида дунё харитасини қайта чизувчи "Рақамли ва Ҳарбий Империя" сифатида намоён бўлмоқда.
Изоҳлар мавжуд емас