Ўзбекистон, Тошкент - Batafsil.uz. Хантавируснинг турли штаммлари дунёнинг бир нечта нуқталарида хавф туғдирмоқда. Исроилда Шарқий Европадан қайтган беморда ушбу вируснинг кам учрайдиган шакли аниқланган бўлса, Испания қирғоқлари яқинида вируснинг хавфли "Анд" штамми тарқалган MV Hondius сайёҳлик кемаси йўловчиларини эвакуация қилиш тадбирлари бошланди. Ҳозирда Жаҳон соғлиқни сақлаш ташкилоти ва халқаро экспертлар вируснинг тарқалиш географиясини синчковлик билан кузатмоқда.
Исроил Соғлиқни сақлаш вазирлиги тасдиқлаган маълумотларга кўра, мамлакатдаги илк ҳолат "европача" штамм бўлиб, беморнинг аҳволи барқарор. Бироқ MV Hondius кемасидаги вазият анча мураккаб: Аргентинадан йўлга чиққан ва бортида 147 киши бўлган ушбу кемада хантавирус оқибатида камида уч киши ҳалок бўлган. Испания ҳукумати Европа комиссияси билан ҳамкорликда кемадаги йўловчиларни қатъий карантин остида Канар оролларида эвакуация қилишни режалаштирмоқда.
Маълумот учун, хантавирус асосан кемирувчилар орқали юқади ва нафас олиш ёки буйрак тизимида оғир асоратларни келтириб чиқариши мумкин. Ҳозирда вирусга қарши махсус даволаш усули ёки вакцина мавжуд эмаслиги сабабли, халқаро тиббий ташкилотлар асосий эътиборни профилактика ва касалликни эрта аниқлашга қаратмоқда. Мутахассисларнинг таъкидлашича, дунё бўйлаб ушбу вируснинг тарқалиш хавфи мавжуд бўлса-да, умумий жамоатчилик учун хавф даражаси пастлигича қолмоқда.
Изоҳлар мавжуд емас