Ўзбекистон, Тошкент - Batafsil.uz. Эрон Ташқи ишлар вазири ўринбосари Мажид Тахт-Раванчи BBC нашрига берган интервьюсида Женевада АҚШ билан музокараларнинг иккинчи раунди бўлиб ўтишини маълум қилди. Учрашув 17 февраль кунига белгиланган.
Дипломатнинг сўзларига кўра, 6 февраль куни Уммонда бўлиб ўтган илк алоқалар "умуман олганда ижобий" кечган, бироқ якуний хулоса чиқаришга ҳали эрта. Теҳрон агар Вашингтон санкцияларни бекор қилиш масаласини жиддий муҳокама қилишга тайёр бўлса, ядровий келишув бўйича муайян келишувларга тайёрлигини билдирган.
Музокаралардаги асосий нуқталар Эрон уранни бойитиш даражасини ҳозирги 60 фоиздан тушириш бўлган. Бироқ Тахт-Раванчи таъкидлашича, "ноль даражали бойитиш" масаласи энди кун тартибида эмас.
Теҳрон фақат иқтисодий чекловлар юмшатилиши эвазига ядровий дастурида чекинишга тайёрлигини билдирмоқда.
Форс дипломати минтақадаги янги ҳарбий можаро "ҳамма учун травматик ва вайронкор" бўлишидан огоҳлантириб, мулоқотни давом эттириш зарурлигини таъкидлаган.
Ушбу музокаралар АҚШнинг Яқин Шарқдаги ҳарбий кучларини ошираётган ва Эронга нисбатан босимни кучайтираётган бир пайтда ўта муҳим аҳамиятга эга. Женевадаги учрашув дипломатик ечим имкониятлари бор ёки йўқлигини кўрсатиб берувчи асосий индикатор бўлиши кутилмоқда.
Эслатиб ўтамиз, аввалроқ Трамп маъмурияти Эрон расмийлари томонидан интернет алоқаси чекланганидан сўнг, маҳаллий фаолларни қўллаб-қувватлаш мақсадида мамлакатга яширинча 6000 га яқин Starlink сунъий йўлдош интернет тўпламларини етказиб берган. Ушбу қурилмаларнинг асосий қисми январь ойида, Теҳрон намойишларни бостириб, мамлакат бўйлаб интернетни бутунлай узиб қўйган бир пайтда етказиб берилган эди.
Изоҳлар мавжуд емас