Ўзбекистон, Тошкент - Batafsil.uz. Саудия Арабистони ҳаво ҳужумидан мудофаа тизимлари Макка минтақаси томон учирилган икки баллистик ракетани тутиб қолди. 11 ноябрь куни содир бўлган ҳодисада ракеталар парчалари муқаддас шаҳар яқинидаги икки ҳудудга тушган.
Бу Макка атрофида сўнгги йилларда қайд этилган бундай биринчи ҳолат эмас. 2016 ва 2017 йилларда ҳам шаҳар томон учирилган ракеталар ҳавода йўқ қилингани ҳақида хабар берилган, 2026 йил сентябрида эса Саудия коалицияси Макка яқинида дрон тутиб қолинганини маълум қилган.
Маълумотларга кўра, ракеталар парчалари Маккадаги Масжидул Ҳаромдан тахминан 35 километр шимоли-шарқда жойлашган Сабуҳа қишлоғи ва масжиддан 21 километр шарқдаги Води ал-Мағмас ҳудудига тушган.
Мамлакат фуқаро мудофааси хизмати ракеталар минтақани нишонга олиб учирилгани, бироқ ҳаво мудофааси томонидан тутиб қолиниб, йўқ қилинганини билдирган. Дастлабки хабарларда жабрланганлар ёки етказилган зарар ҳақида маълумот келтирилмаган.
Саудия фуқаро мудофааси бу ҳаракатни тинч аҳоли объектларига таҳдид деб баҳолаб, халқаро гуманитар ҳуқуқ бузилганини таъкидлаган. Ҳусийлар эса аввал ҳам Макка ва Мадинани нишонга олганлик ҳақидаги айбловларни рад этиб, ўз ҳарбий операциялари Саудия Арабистонидаги ҳарбий ва стратегик объектларга қаратилганини билдириб келган.
Макка атрофидаги шунга ўхшаш биринчи йирик ҳодисалардан бири 2016 йил 27 октябрда қайд этилган. Ўшанда Саудия Арабистони бошчилигидаги коалиция Яманнинг Саъда вилоятидан Макка томон учирилган баллистик ракетани шаҳардан тахминан 65 километр узоқликда тутиб қолганини маълум қилган.
Саудия томони ракета ҳусийлар томонидан учирилганини айтган. Ҳусийлар эса Маккани нишонга олганликни рад этиб, ракета Жидда аэропортига йўналтирилганини даъво қилган.
Шунингдек, 2026 йил 15 сентябрь куни Саудия бошчилигидаги коалиция Макканинг жанубида дрон тутиб қолинганини маълум қилган. Коалиция вакили Туркий ал-Моликий учувчисиз қурилма муқаддас шаҳарнинг чекланган ҳаво ҳудудига киришидан олдин йўқ қилинганини айтганди.
Можаро нима сабабдан давом этмоқда?
Ямандаги можаро 2014 йилда ҳусийлар мамлакат пойтахти Сано ва бир қатор ҳудудларни эгаллаб олганидан кейин кескинлашган. 2015 йилда Саудия Арабистони халқаро ҳамжамият тан олган Яман ҳукуматини қўллаб-қувватлаш мақсадида ҳарбий амалиёт бошлаган.
2022 йилда БМТ воситачилигида эришилган сулҳ жангларни сезиларли даражада камайтирган эди. Бироқ 2026 йилда Саудия Арабистони ҳудудига ракета ва дрон ҳужумлари, шунингдек, Ямандаги ҳаво зарбалари яна кучайган. Бу вазият Қизил денгиз билан Адан кўрфазини боғлайдиган Боб ал-Мандаб бўғози хавфсизлигига ҳам таҳдид солмоқда. Ушбу бўғоз халқаро денгиз савдоси учун муҳим йўналишлардан бири ҳисобланади.
Изоҳлар мавжуд емас