Машғулотларда 14 нафар ҳарбий хизматчининг ҳалок бўлиши Қозоғистонда ҳарбий ислоҳотга сабаб бўлди

Ўзбекистон, Тошкент - Batafsil.uz. Қозоғистон президенти Қосим-Жомарт Тўқаев Мангистау вилоятидаги машғулотлар пайтида 14 нафар ҳарбий хизматчи ҳалок бўлган фожиадан сўнг ҳарбий ислоҳот режасини тайёрлашни топширди. Давлат раҳбари бошқарув тизимини, ҳарбийларни тайёрлашга ёндашувларни ўзгартириш, ҳар бир ҳарбий хизматчининг хавфсизлигини таъминлаш зарурлигини таъкидлади.

Қосим-Жомарт Тўқаев 27 сентябрь куни Остонада Мудофаа вазирлиги раҳбарияти билан йиғилиш ўтказди. Учрашув машғулотлар давомида ҳалок бўлган ҳарбий хизматчилар хотирасига бир дақиқалик сукут сақлаш билан бошланди.
Президент ҳалок бўлганларнинг оила аъзоларига ҳамдардлик йўллаганини маълум қилди ва яқинларига зарур ёрдам кўрсатилишини таъкидлади.

Қосим-Жомарт Тоқаев нафақат фожианинг бевосита сабабларини, балки машғулотлар нима учун айнан шу форматда ташкил этилгани ва уларнинг вазифалари замонавий таҳдидларга қанчалик мос келишини аниқлашни талаб қилди.

"Бу ўқувларнинг ғоясини ким ишлаб чиқди ва тасдиқлади? Бош штабнинг роли ва мувофиқлаштириш қандай? Нима учун ҳарбий-денгиз кучлари бош қўмондони машғулотларда иштирок этмади?", - деди Қозоғистон раҳбари.

Унинг сўзларига кўра, машғулотлар давомида ҳарбий хизматчилар барча зарур анжомлар, жумладан, денгиз қутқарув нимчалари билан таъминланмаган. Ҳукумат комиссияси машғулотларни тайёрлаш, таъминлаш ва хавфсизлик талабларига риоя қилиш учун масъул бўлган барча мансабдор шахсларнинг ҳаракатларига баҳо бериши керак.

Шу билан бирга, Мудофаа вазирлигининг комплекс текшируви бошланди. У армиянинг хизматини ташкил этиш, таъминоти, моддий ва молиявий таъминотини қамраб олади. Комиссияга Хавфсизлик кенгаши раиси ўринбосари Аида Балаева раҳбарлик қилди.

"Ушбу фожиали воқеа армиядаги кўплаб камчиликлар ва профессионалликнинг йўқлигини яққол кўрсатди. Туб ҳарбий ислоҳотлар вақти келди. Бу кечиктириб бўлмайдиган вазифадир", - деди Тўқаев.

Кадрлар ўзгариши доирасида Айдос Мирзахметов янги мудофаа вазири этиб тайинланди. Унинг олдига Қуролли Кучларни ислоҳ қилиш ва мудофаа идораси фаолияти самарадорлигини ошириш вазифалари қўйилди.

Армияни модернизация қилиш асосий йўналишлардан бири бўлиши керак. Президентнинг сўзларига кўра, қўмондонлик тизимини халқаро тажрибани инобатга олган ҳолда қайта қуриш, рақамли технологиялардан инсон меҳнатини алмаштириши мумкин бўлган жойларда фойдаланиш зарур.

Президент бюджет маблағларини сарфлаш ёндашувларини қайта кўриб чиқиш бўйича алоҳида топшириқ берди. Унинг сўзларига кўра, давлат томонидан ажратилган ҳар бир маблағ мамлакат мудофаа қобилиятини мустаҳкамлашга хизмат қилиши керак, мақсадсиз харажатлар ва талон-торожларга йўл қўйилмайди.

Яна бир вазифа — жамоа таркибини танлаш тизимини ўзгартиришдир. Қосим-Жомарт Тўқаев тайинловлар шахсий садоқатга эмас, балки тажриба ва касбий малакага асосланиши кераклигини таъкидлади.

Хавфсизлик кенгаши аппаратига Мудофаа вазирлиги билан биргаликда ўн кун муддатда Ҳарбий ислоҳотлар режасини тайёрлаш топширилди. Уни октябрь ойининг иккинчи ярмида Хавфсизлик кенгаши йиғилишида кўриб чиқиш режалаштирилган.
Қайд этилишича, Тўқаев фожиадан сўнг армияда тарбиявий ишларни кучайтириш, ҳарбий хизматчиларнинг хавфсизлиги ва ҳаётини сўзсиз устувор вазифага айлантириш зарурлигини таъкидлаган.

"Ватан ҳимояси ҳар бир фуқаронинг муқаддас бурчидир. Ўз ҳаётини ҳарбий хизматга бағишлаганлар давлатимизнинг ғамхўрлиги ва қўллаб-қувватлашига муносиб", - деди президент.

Ҳозирда иш бўйича Қозоғистон Қуролли Кучларининг олий ва катта қўмондонлик таркибининг беш нафар мансабдор шахси қўлга олинган. Улар орасида штаб бошлиғи – Ҳарбий-денгиз кучлари бош қўмондонининг биринчи ўринбосари, иккита ҳарбий қисм командири, денгиз пиёдалари ротаси командири ва катер командири бор.