"Мен Венесуэла президентиман ва ўзимни ҳарбий асир деб ҳисоблайман" — Нью-Йоркда Николас Мадуро устидан илк суд мажлиси бўлиб ўтди

Ўзбекистон, Тошкент - Batafsil.uz. Венесуэла етакчиси Николас Мадуро АҚШ суди олдида жавоб берди. Суд жараёнида у ўзининг айбсиз эканлигини таъкидлаб, ҳамон Венесуэланинг амалдаги президенти эканини ва ўзини "ҳарбий асир" деб ҳисоблашини маълум қилди.

Мадуро суд залига қўлларида кишанларсиз, бироқ оёқларида занжир ва маҳбуслар кийимида олиб келинган. У испан тилида гапириб, таржимон хизматидан фойдаланган. Суд мажлиси бошланишидан аввал у залдагиларни Янги йил билан табриклаган. Суд Мадурога мажлис давомида қилган қайдларини ўзида сақлаб қолишга рухсат берган.

Мадуронинг манфаатларини WikiLeaks асосчиси Жулиан Ассанжнинг собиқ адвокати Барри Поллак ҳимоя қилмоқда. Унинг турмуш ўртоғи Силия Флоресга эса Марк Доннелли адвокатлик қилмоқда. Ҳимоя томонининг маълум қилишича, Силия Флорес мамлакатдан олиб чиқиб кетилаётган вақтда жароҳат олган — унинг қовурғалари лат еган. Мадуронинг хотини судда ўзини айбсизлигини айтган.

Мажлис давомида адвокат Поллак ҳозирча гаров эвазига озод қилиш сўровини киритмаслигини, буни кейинроқ амалга оширишини билдирган.

Суд Мадуро ва унинг рафиқасига Венесуэла консуллик ходимлари билан кўришишга рухсат берган.

Кейинги суд мажлиси 17 март кунига белгиланди.

Мажлис якунида Николас Мадуро ва унинг рафиқаси кучайтирилган конвой ҳамроҳлигида суд залидан олиб чиқиб кетилган.

Эслатиб ўтамиз, АҚШнинг "Delta Force" махсус бўлинмаси Николас Мадурони қўлга олиб, Нью-Йоркка олиб келган эди. Президент Трамп Венесуэла нефть оқими ва бошқаруви вақтинча АҚШ назоратига ўтганини эълон қилганди.