Ўзбекистон, Тошкент - Batafsil.uz. АҚШнинг Нью-Йорк штати губернатори Кэти Хокул давосиз касалликка чалинган беморларга муайян шартлар асосида ўз ихтиёри билан ҳаётни якунлаш учун дори воситасини олиш ҳуқуқини берувчи қонунни имзолади.
Янги қонунга кўра, яшашига олти ойдан кам вақт қолгани тиббий жиҳатдан тасдиқланган, 18 ёшдан ошган, ақли расо ва дорини мустақил қабул қилиш имкониятига эга бўлган беморлар ушбу тартибдан фойдаланиши мумкин.
Ҳужжатда психик саломатликни баҳолаш ҳамда штатда доимий яшаш каби қўшимча талаблар ҳам назарда тутилган. Politico нашрининг ёзишича, мазкур қонун АҚШдаги бу соҳадаги энг қатъий ҳуқуқий ҳужжатлардан бири ҳисобланади.
Маълумот учун, бугунги кунда АҚШнинг 14 та штатида шифокор ёрдамида ҳаётни якунлашга оид қонунчилик амал қилади. Бу борада биринчи қонун 1994 йилда Орегон штатида қабул қилинган.
Олдинроқ Франция парламенти ҳам оғир касалликларга чалинган беморларга маълум шароитларда “ҳаётдан кўз юмишда” ёрдам олиш имконини берувчи қонунни ниҳоят маъқуллаганди. Қарор кўп йиллик баҳслар ва жамоатчилик мунозараларидан сўнг қабул қилинган эди, натижада Франция бундай амалиётга рухсат берилган давлатлар қаторига қўшилган.
Изоҳлар мавжуд емас