Ўзбекистон, Тошкент - Batafsil.uz. Telegram асосчиси Павел Дуров Россия расмийлари томонидан "терроризмга шериклик" айблови билан қўзғатилган жиноят ишига муносабат билдирди. У бу ҳолатни мессенжерни блоклаш учун навбатдаги баҳона деб атади.
Унинг сўзларига кўра, давлат идоралари ҳар куни россияликларнинг Telegram тармоғидан фойдаланишини чеклаш, шахсий ҳаёт дахлсизлиги ва сўз эркинлиги ҳуқуқларини йўқ қилиш учун янги сабаблар ўйлаб топмоқда.
Дуров ўз баёнотида Россия ҳукуматининг хатти-ҳаракатларини "ўз халқидан қўрқадиган давлатнинг аянчли манзараси" деб таърифлаган. Тадбиркорнинг фикрича, терроризм билан боғлиқ айбловлар асоссиз бўлиб, асосий мақсад ижтимоий тармоқлардаги эркин мулоқотни тўлиқ назоратга олишдир. У Telegram фойдаланувчиларнинг махфийлигини ҳимоя қилишда давом этишини яна бир бор тасдиқлаган.
Эслатиб ўтамиз, аввалроқ Россия ҳуқуқни муҳофаза қилиш органлари Павел Дуровга нисбатан оғир айбловлар билан жиноят иши қўзғатган эди. Ушбу вазият Telegram ва Россия давлат органлари ўртасидаги кўп йиллик зиддиятнинг янги босқичи сифатида кўрилмоқда. Ҳозирда мессенжер асосчисига нисбатан эълон қилинган қидирув ва тергов жараёнлари халқаро ҳамжамият эътиборида қолмоқда.
Изоҳлар мавжуд емас