Ўзбекистон, Тошкент - Batafsil.uz. АҚШ президенти Доналд Трамп маълум қилишича, АҚШ ҳарбий-денгиз кучлари Кариб денгизи ҳудудида наркотик моддалар олиб кетаётган сувости кемасини йўқ қилган.
Маълумотларга кўра, кемада бўлган тўрт кишидан иккитаси тирик ҳолда қўлга олинган, яна иккитаси эса операция вақтида ҳалок бўлган.
Трампнинг айтишича, сувости кемасига зарба АҚШга "машҳур наркотрафик йўналиши" орқали йўл олган пайтда берилган. Унинг сўзларига кўра, разведка маълумотлари кемада асосан фентанил ҳамда бошқа ноқонуний моддалар мавжуд бўлганини тасдиқлаган.
"Агар мен бу сувости кемасининг қирғоққа етиб боришига йўл қўйганимда, камида 25 минг америкалик ҳалок бўларди. Тирик қолган икки нафар наркотеррорчи Эквадор ва Колумбияга топширилади — у ерда улар устидан суд бўлиб ўтади. АҚШ ҳарбий кучлари орасида талафот қайд этилмади", — деб ёзди Трамп ўзининг "Truth Social"даги саҳифасида.
Маълумотларга кўра, наркотиклар савдоси билан шуғулланувчи картеллар кўпинча қўлбола ёки ярим сувости кемаларидан фойдаланади. Улар асосан кокаин ва бошқа ноқонуний моддаларни АҚШга етказишда қўлланилади. Бундай кемаларнинг аксарияти бир марталик бўлиб, фақат оз қисмигина мақсадга етади. Шунга қарамай, етказиб берилган кам миқдор ҳам картеллар учун катта фойда келтиради.
Айрим тахминларга кўра, бундай кемаларни ясашда картеллар рус мутахассисларининг ёрдамига таянаётган бўлиши мумкин. Илгари Мексика ва АҚШ қўриқчилари томонидан қўлга олинган айрим сувости кемаларида совет ёки рус ишлаб чиқаришидаги жиҳозлар аниқланган. Бироқ бу борада ҳозирча расмий тасдиқ мавжуд эмас.
Сўнгги чиқишларида Доналд Трамп наркотик картелларига қарши кураш доирасида АҚШ "денгиз йўналишларини тўлиқ назоратга олганини" таъкидлади. Унга кўра, Вашингтон ҳозирда Венесуэладаги картелларга қарши курашнинг янги босқичига ўтиш масаласини кўриб чиқмоқда.
Изоҳлар мавжуд емас