Ўзбекистон, Тошкент - Batafsil.uz. Венесуэлада содир бўлган қўшма зилзилалар оқибатида ҳалок бўлганлар сони 3 811 нафарга етди. Миллий ассамблея президенти Хорхе Родригеснинг маълум қилишича, табиий офат оқибатида 16 740 киши жароҳатланган, 17 907 нафар аҳоли эса бошпанасиз қолган.
Эслатиб ўтамиз, Венесуэлада 25 июн куни иккита кучли зилзила қайд этилган, бунинг оқибатида мамлакатда фавқулодда ҳолат эълон қилинганди. Табиий офат туфайли пойтахт Каракасда бинолар қулаб тушган эди.
Мамлакат Муваққат президенти Делси Родригес давлат телеканали орқали чиқиш қилиб, вайронагарчиликларни тиклаш учун халқаро санкцияларни бекор қилиш ва хорижда музлатиб қўйилган давлат активларини қайтаришга чақирган. Унинг таъкидлашича, блокдан чиқарилган маблағлар нафақат қайта тиклаш ишларига, балки бандлик ва таълим дастурларига ҳам йўналтирилади. Родригес ушбу масалада Англия банкида сақланаётган 31 тонна олтинни қайтаришни сўраб Қирол Чарльзга мактуб йўллаганини, шунингдек, Халқаро валюта жамғармаси раҳбари билан ҳам музокара ўтказганини билдирган.
АҚШ, Европа Иттифоқи ва бошқа давлатлар Венесуэлага нисбатан сўнгги йигирма йил ичида антидемократик фаолият ва наркотрафик айбловлари билан қатъий санкциялар жорий этиб келган. Жорий йил бошида АҚШ томонидан Венесуэла президенти Николас Мадуро қўлга олингач, Вашингтон мамлакатнинг нефть секторига нисбатан чекловларни юмшатган эди. 24 июндаги зилзилалардан сўнг эса АҚШ табиий офат оқибатларини бартараф этиш билан боғлиқ молиявий операцияларга тўрт ой муддатга рухсат берган.
Изоҳлар мавжуд емас