Ўзбекистон, Тошкент - Batafsil.uz. Ўзбекистонда туғилган америкалик дипломат Серджио Гор АҚШ президенти Дональд Трамп маъмуриятидаги юқори лавозимларга эҳтимолий номзод сифатида муҳокама қилинмоқда. Унинг номи Давлат котиби ёки Оқ уй аппарати раҳбари лавозимлари билан боғлиқ ҳолда тилга олинган, бироқ Горнинг ўзи бошқа лавозимга ўтиш нияти йўқлигини билдирган.
Хорижий ОАВ хабарига кўра, АҚШнинг Ҳиндистондаги элчиси Серджио Гор республикачиларнинг оралиқ сайловлардаги мағлубиятидан кейин маъмуриятдаги таъсирини кенгайтириши мумкин бўлган шахслардан бири сифатида кўрилмоқда.
Маълумот учун, Гор 1986 йилда Тошкентда, ўша пайтда Совет Иттифоқи таркибида бўлган Ўзбекистонда туғилган. Унинг асл исми Сергей Гороховский бўлган. Кейинчалик оиласи Мальтага, у ердан эса АҚШга кўчиб ўтган. Гор Дональд Трампнинг сиёсий жамоаси билан узоқ йиллардан бери ишлаб келади. У Трампнинг сайловолди кампаниясида иштирок этган, шунингдек, унинг ўғли Дональд Трамп кичик билан биргаликда нашриёт компаниясига асос солган.
Гор аввал Трампнинг биринчи маъмуриятидаги кадрлар сиёсати билан шуғулланган, кейин эса Оқ уйнинг Президент кадрлари бошқармасига раҳбарлик қилган. Ушбу лавозимда федерал ҳукуматдаги минглаб сиёсий тайинловларни текшириш ва амалга ошириш жараёнларида иштирок этган.
2025 йилда Трамп уни АҚШнинг Ҳиндистондаги элчиси ва Жанубий ҳамда Марказий Осиё бўйича махсус вакили этиб тайинлаган. Гор 2025 йил ноябрь ойидан Ҳиндистонда фаолият юритмоқда. Унинг АҚШ президенти билан тўғридан-тўғри алоқаси ва Марказий Осиёдаги дипломатик фаолияти Вашингтондаги сиёсий доиралардаги таъсирини ҳам оширгани айтилмоқда.
Горнинг номи бир нечта юқори лавозимлар, жумладан, Оқ уй аппарати раҳбари Сьюзи Уайлс ўрнини эгаллаш ёки Давлат котиби Марко Рубио ўрнига тайинланиш эҳтимоли билан боғлиқ ҳолда тилга олинган.
Шунингдек, Давлат котибининг ўринбосари Крис Ландау лавозими ҳам эҳтимолий вариантлардан бири сифатида кўрилган.
Бироқ Гор бу хабарларни рад этган. У хорижий нашрига берган изоҳида бошқа лавозимга қизиқмаётганини билдириб, Марко Рубиони Давлат котиби сифатида алмаштириб бўлмаслигини таъкидлаган. Оқ уй вакили ҳам бу хабарларни асоссиз миш-миш деб атаган.
Горнинг Трамп маъмуриятидаги эҳтимолий янги лавозими ҳақидаги хабарлар республикачиларнинг оралиқ сайловлардаги натижаларидан кейин пайдо бўлган. Шу билан бирга, Марко Рубио ва Сьюзи Уайлс маъмуриятдан кетиш нияти борлигини расман билдирмаган.
Аввалроқ Демократлар Конгресснинг ҳар икки палатасида — Вакиллар палатаси ва Сенатда кўпчиликни қўлга киритганди.
Изоҳлар мавжуд емас