Ўзбекистон, Тошкент - Batafsil.uz. Ўзбекистон Соғлиқни сақлаш вазирлиги куз-қиш мавсумида юқиш хавфи ортиши мумкин бўлган Коксаки вируси ҳақида огоҳлантирди. Мутахассислар инфекциянинг асосий белгилари ва ундан сақланиш чораларини тушунтирди.
Коксаки вируси энтеровируслар гуруҳига киради ва асосан болаларда учрайди. Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабековнинг маълум қилишича, касаллик тана ҳароратининг 39–40 даражагача кўтарилиши, бош оғриғи, ҳолсизлик, кўнгил айниши ва қусиш билан кечиши мумкин. Инфекциянинг асосий белгиларидан яна бири — қўл кафти, оёқ товони ва оғиз шиллиқ қаватида тошмалар пайдо бўлишидир.
Вирус юқишининг олдини олиш учун қўлларни совун билан мунтазам ювиш, ўйинчоқлар ва умумий фойдаланишдаги буюмларни тозалаш, мева-сабзавотларни яхшилаб ювиш ҳамда хавфсиз ичимлик сувидан фойдаланиш тавсия этилади. Агар касаллик белгилари пайдо бўлса, шифокорга мурожаат қилиш керак. Мутахассислар антибиотикларни ўзбошимчалик билан қабул қилмасликни ҳам таъкидламоқда, чунки бу дорилар вирусли инфекцияларга қарши таъсир қилмайди.
Эслатиб ўтамиз, Ўзбекистонда грипп ва ўткир респиратор вирусли инфекциялар (ЎРВИ) билан касалланишнинг мавсумий ўсишига ҳам тайёргарлик кўрилмоқда. Соғлиқни сақлаш вазирлиги маълумотларига кўра, касалланиш ҳолатлари одатда ноябрь–февраль ойларида кўпаяди. Шу муносабат билан тиббиёт муассасаларида зарур дори воситалари ва тиббий жиҳозлар захираси тайёрланган.
Изоҳлар мавжуд емас