Ўзбекистон, Тошкент - Batafsil.uz. Португалиялик футбол юлдузи Криштиану Роналду миллий терма жамоадаги фаолиятини якунлашини маълум қилди. 41 ёшли футболчи 23 йил давомида Португалия шарафини ҳимоя қилиб, жамоа сафида 234 та учрашув ўтказди ва 146 та гол урди.
Роналду бу ҳақда Instagram саҳифасида эълон қилинган видеомурожаатида маълум қилган.
У ўз мурожаатида миллий жамоанинг 7-рақамли футболкасини қайтариш вақти келганини айтган. Футболчи бу рақамни 23 йил давомида кийиш унинг учун катта шараф ва масъулият бўлганини таъкидлаган.
Роналду Португалия терма жамоасидаги илк ўйинини 2003 йил 20 август куни Қозоғистонга қарши ўтказган. Ўша вақтда у 18 ёшда бўлган. Кейинги йилларда футболчи миллий жамоанинг асосий етакчиларидан бирига айланган ва халқаро футбол тарихидаги энг кўп гол урган футболчи бўлган.
Унинг терма жамоа билан эришган энг муҳим ютуғи 2016 йилда Францияда ўтказилган Европа чемпионатидаги ғалабаси ҳисобланади. Португалия финалда Францияни 1:0 ҳисобида мағлуб этиб, ўз тарихида илк бор ушбу мусобақада чемпион бўлган. Роналду финалда жароҳат олиб майдонни тарк этган бўлса-да, жамоани қўллаб-қувватлашда давом этган.
Шунингдек, у Португалия билан 2019 ва 2025 йилларда УЕФА Миллатлар лигасида ғолиб чиққан. Роналду 2006 йилдан 2026 йилгача олтита жаҳон чемпионатида иштирок этган. Ушбу мусобақаларнинг барчасида гол уришга муваффақ бўлиб, тарихда олти хил мундиалда тўп киритган биринчи футболчига айланган.
Клублар миқёсида ҳам Роналду катта ютуқларга эришган. У "Манчестер Юнайтед", "Реал Мадрид", "Ювентус" ва Саудия Арабистонининг "Ал-Наср" клубларида тўп сурган. Футболчи фаолияти давомида беш марта "Олтин тўп" мукофотини қўлга киритган ва Чемпионлар лигасида беш марта ғолиб бўлган.
Роналдунинг халқаро футболдан кетиши Португалия терма жамоаси тарихидаги муҳим даврнинг якунланишини англатади. У миллий жамоа сафидаги ўйинлар ва голлар сони бўйича ҳозиргача энг юқори кўрсаткичларга эга.
Эслатиб ўтамиз, аввалроқ Португалия футбол федерацияси 41 ёшли ҳужумчи Криштиану Роналдуга нисбатан интизомий чора кўриб, уни терма жамоа сафидан вақтинчалик четлатганди.
Изоҳлар мавжуд емас