Ўзбекистон, Тошкент - Batafsil.uz. Тошкент шаҳрининг Миробод туманида жойлашган Давлат активларини бошқариш агентлигининг маъмурий биноси электрон аукционда 251,6 миллиард сўмга сотилди. Савдо натижасида объектнинг якуний нархи бошланғич қийматидан 52 фоизга ошган.
Давлат активларини бошқариш агентлиги маълум қилишича, аукцион 9 ноябрь куни E-auksion платформасида ўтказилган. Амир Темур кўчаси, 6-уйда жойлашган бино савдога 165,5 миллиард сўм бошланғич нархда чиқарилган. Мазкур объект биринчи марта 2025 йил август ойида ҳам шу нархда очиқ аукционга қўйилган.
Бинонинг сотилиши вазирлик ва идоралар ҳамда уларнинг тизим ташкилотларини Янги Тошкентга кўчириш дастури доирасида амалга оширилмоқда. Ушбу дастур пойтахтдаги 83 та кўчмас мулк объектини сотишни назарда тутади.
Агентлик маълумотларига кўра, ҳозиргача Тошкентда вазирлик ва идораларга тегишли саккизта маъмурий бино жами 1,12 триллион сўмга сотилган. Яна 11 та объект умумий бошланғич қиймати 1,2 триллион сўм бўлган нархда аукционга қўйилган.
Сотувдан тушган маблағлар Янги Тошкентда маъмурий инфратузилмани барпо этишга йўналтирилиши режалаштирилган.
Аввалроқ Давлат активларини бошқариш агентлиги Fonon заргарлик заводига эгалик қилувчи Gold Moon Tashkent компаниясидаги 100 фоиз давлат улушини очиқ аукционга чиқарганди. Лотнинг бошланғич нархи 316,7 миллиард сўм этиб белгиланган эди.
Изоҳлар мавжуд емас