Ўзбекистон, Тошкент - Batafsil.uz. Ўзбекистоннинг умумий олтин-валюта захиралари июль ойида 589,75 миллион долларга кўпайиб, 1 август ҳолатига 64,34 миллиард долларга етди. Захиралар июндаги пасайишдан сўнг яна ўсишни бошлади.
Марказий банк маълумотларига кўра, захираларнинг асосий қисмини олтин ташкил этмоқда. Унинг қиймати бир ойда 365,3 миллион долларга ошиб, 56,12 миллиард долларга етган.
Жаҳон бозорида олтин нархининг 4 016,70 доллардан 4 052,20 долларгача кўтарилиши захиралар қийматига қарийб 490 миллион доллар ижобий таъсир кўрсатган. Бироқ олтиннинг физик ҳажми бироз камайиб, 13,88 миллион троя унциясидан 13,85 миллион троя унциясига тушган. Бу қарийб 430,8 тонна олтинга тенг.
Захираларнинг валюта қисми эса июль ойида 208,8 миллион долларга ошиб, 7,65 миллиард долларга етган. Шундан 5,89 миллиард доллари хорижий банкларда сақланаётган нақд валюта ва депозитларга, 1,76 миллиард доллари хорижий қимматли қоғозларга тўғри келган.
Шу билан бирга, World Gold Council маълумотларига кўра, Ўзбекистон 2026 йилнинг биринчи ярмида жами 41 тонна олтин харид қилган. Мамлакат июнь ойида 9 тонна олтин сотиб олиб, Польша ва Хитойдан кейин дунёдаги учинчи йирик харидор бўлган.
Маълумот учун, Ўзбекистон 2026 йил июнь ойигача олтин экспорт қилмаганди. Бунинг ортидан мамлакат экспорти ўтган йилнинг мос даврига нисбатан 8,8 фоизга қисқариб, ташқи савдо манфий сальдоси эса 9,3 миллиард долларга етган эди.
Изоҳлар мавжуд емас