Ўзбекистон, Тошкент - Batafsil.uz. Жиноят-процессуал кодексига киритилаётган янги ўзгартиришларга кўра, ишни судга қадар юритиш босқичида қамоққа олиш ёки уй қамоғи тарзидаги эҳтиёт чораларини ўзгартириш ва бекор қилиш ваколатлари прокурор ҳамда терговчилардан олиниб, фақат тергов судьяларига ўтказилмоқда. Тегишли қонун лойиҳаси муҳокамага эълон қилинди.
Янги тартибга мувофиқ, тергов судьяси эҳтиёт чораларини қўллаш ва бекор қилишдан ташқари, ушлаб туриш муддатини узайтириш, тинтув ўтказиш, мол-мулкни хатлаш, телефон сўзлашувларини эшитиш, паспорт амал қилишини тўхтатиш ва чиқиш ҳуқуқини вақтинча чеклаш каби санкцияларни ҳам кўриб чиқади. Ишни холис аниқлаш мақсадида тергов судьяси томонидан талаб қилинган маълумотлар ва ҳужжатлар 8 соат ичида тақдим этилиши шарт қилиб белгиланмоқда.
Шунингдек, лойиҳада гумон қилинувчи ва айбланувчиларнинг ҳуқуқлари ҳам кенгайтирилган бўлиб, уларнинг ўзи эҳтиёт чорасини ўзгартириш бўйича судга бевосита илтимоснома киритиш ҳуқуқига эга бўлади. Бундай аризалар 48 соат ичида кўриб чиқилади, тергов судьясининг ажрими устидан эса 72 соат ичида апелляция шикояти бериш мумкин бўлади. Қонун расман эълон қилинган кундан эътиборан кучга киради.
Олдинроқ Ўзбекистон Конституциявий суди шахсни маъмурий тартибда уч суткагача, ҳужжатлар бўлмаган тақдирда эса прокурор санкцияси билан ўн суткагача ушлаб туришга рухсат берувчи меъёрни Конституцияга мувофиқ эмас деб топганди. Суднинг кўрсатишича, суд қарорисиз ушлаб туриш муддати 48 соатдан ошмаслиги керак.
Изоҳлар мавжуд емас