Ўзбекистон, Тошкент - Batafsil.uz. Фавқулодда вазиятлар вазири, генерал-майор Азизбек Икромов бошчилигидаги текширув натижасида Indenim савдо-кўнгилочар марказида инсонлар ҳаётига таҳдид солувчи кўплаб камчиликлар аниқланган. Мажмуа фаолияти барча камчиликлар тўлиқ бартараф этилгунга қадар вақтинча тўхтатилиб, бинонинг чиқиш эшиклари муҳрланди.
Текширув давомида кундалик минглаб одамлар ташриф буюрадиган марказда захира эвакуация эшиклари тадбиркорлар томонидан вақтинчалик савдо нуқталари билан тўсиб қўйилган ёки ўзбошимчалик билан ёпиб ташлангани аниқланган.
Шунингдек, ички ёнғин ўчириш кранларида сув йўқ, ўчириш енглари чириган ва сув очиш дастаклари мавжуд эмас. 4-қаватда жойлашган болалар майдончасида ёнғин сигнализацияси ва тутун сўрувчи мосламалар ишламайди. Аттракционларнинг электр симлари тартибсиз ўрнатилган, бу эса қисқа туташув ва ёнғин хавфини юзага келтириши мумкин.
Мутасаддиларнинг таъкидлашича, ушбу кескин чора яқинда Тошкентдаги Aviator Korzinka савдо мажмуасида содир бўлган ва инсон ўлимига сабаб бўлган ёнғин каби фожиаларнинг олдини олиш мақсадида амалга оширилган.
Ушбу мажмуада содир бўлган ёнғиндан сўнг одамлар гавжум бўладиган объектлар текширувдан ўтказила бошланган. Рейдлардан бирида инспекторлар савдо-кўнгилочар мажмуаларидан бирининг болалар ўйин майдончасида ёнғин хавфсизлиги жиддий бузилганини аниқлаганди. Аниқланган камчиликларни бартараф этиш бўйича раҳбариятга кўрсатма берилган эди.
"Ҳеч ким ёнғин чиқмайди деб кафолат бера олмайди. Ёнғин содир бўлса, одамлар ваҳимага тушиб қолади. Бундай пайтда захира эшикларининг ёпиқлиги ёки ёнғин ўчириш кранларида сув йўқлиги фожиага олиб келиши мумкин", — дейди Сурхондарё вилояти ФВБ бўлим бошлиғи.
Мажмуа раҳбариятига аниқланган барча камчиликларни бартараф этиш бўйича ёзма кўрсатма ва йўриқномалар берилган. Марказ фақат хавфсизлик талабларига тўлиқ жавоб берган тақдирдагина ўз фаолиятини қайта тиклаши мумкин. Шунингдек, барча ижарачи тадбиркорлар ҳам ўз савдо нуқталарида ёнғин хавфсизлиги учун шахсан масъул экани ҳақида огоҳлантирилган.
Изоҳлар мавжуд емас