Ўзбекистон, Тошкент - Batafsil.uz. Испаниянинг Барселона шаҳрида 27 июль куни метро туннелида юз берган кучли ёнғин оқибатида 130 нафардан ортиқ йўловчи жабрланди. "Клот" ва "Глориес" станциялари оралиғида тутунга тўлган вагондаги 136 нафар йўловчи авария эшикларини очиб, темирйўл излари бўйлаб очиқ ҳавога чиқишга мажбур бўлган.
Ҳодиса жойига 19 та тез тиббий ёрдам бригадаси ҳамда 22 та ўт ўчириш экипажи зудлик билан сафарбар этилган.
Маълум бўлишича, шифокорлар кўригидан ўтган 129 нафарга енгил жароҳат ва тутундан заҳарланиш ташхиси қўйилган. Яна етти кишининг аҳволи ўртача оғир деб баҳоланмоқда.
Дастлабки маълумотларга кўра, туннель қопламасининг бир қисми қулаб тушиб, ёнғин келиб чиққан. Қутқарувчилар алангани тўлиқ бартараф этган, метро қатновини эса 28 июль эрталабдан қайта тиклаш режалаштирилган.
Олдинроқ Ҳиндистон Ташқи ишлар вазирлиги Нью-Деҳлидаги меҳмонхонада юз берган ёнғин оқибатида ҳалок бўлганлар орасида бир нафар Ўзбекистон фуқароси ҳам борлигини маълум қилганди.
Изоҳлар мавжуд емас