Ўзбекистон, Тошкент - Batafsil.uz. Президент Шавкат Мирзиёев Тошкентга ташриф буюрган АҚШ Савдо вакили Жеймисон Грирни қабул қилди. Учрашувда Ўзбекистон ва АҚШ ўртасидаги савдо-иқтисодий ҳамкорликни кенгайтириш, мамлакатнинг Жаҳон савдо ташкилотига аъзо бўлиш жараёни ҳамда янги инвестиция лойиҳалари муҳокама қилинди.
Суҳбат аввалида Жеймисон Грир АҚШ президенти Дональд Трампнинг самимий саломи ва эзгу тилакларини Шавкат Мирзиёевга етказган. Томонлар Ўзбекистон ва АҚШ ўртасидаги стратегик шерикликни янада мустаҳкамлаш, савдо-иқтисодий алоқаларни ривожлантириш ҳамда ўзаро манфаатли лойиҳаларни амалга ошириш масалаларига алоҳида эътибор қаратган.
Учрашувда Тошкент халқаро инвестиция форуми доирасида америкалик ишбилармонлар иштирокида ўтказилган давра суҳбати натижалари ҳам кўриб чиқилган. Янги инвестиция ташаббуслари ва икки давлат бизнес вакиллари ўртасидаги ҳамкорликни кенгайтириш имкониятлари муҳокама қилинган.
Шунингдек, Ўзбекистоннинг Жаҳон савдо ташкилотига аъзо бўлиш жараёни ҳам кун тартибидан ўрин олган. АҚШ томони мазкур жараёнда Ўзбекистонни қўллаб-қувватлашни давом эттиришга тайёр эканини билдирган.
Ташриф доирасида Жеймисон Грир Президент Администрацияси раҳбари Саида Мирзиёева билан ҳам учрашган. Унинг таъкидлашича, сўнгги бир йил давомида икки давлат ўртасидаги ҳамкорлик янги босқичга кўтарилган.
Саида Мирзиёева яқин вақт ичида ўзаро савдо ва инвестицияларни рағбатлантириш бўйича битим имзоланиши кутилётганини маълум қилди ҳамда АҚШ томонига Ўзбекистон билан ҳамкорликни ривожлантиришга қаратаётган эътибори учун миннатдорлик билдирган.
Бундан олдин Нью-Йоркда Ўзбекистон ва АҚШ ўртасида меҳнат миграцияси соҳасида янги келишувларга эришилганди. Гап мутахассисларни тайёрлаш, қонуний ишга жойлаштириш ва хорижда фуқароларнинг ҳуқуқларини ҳимоя қилишни кучайтириш ҳақида кетмоқда.
Изоҳлар мавжуд емас