Ўзбекистон, Тошкент - Batafsil.uz. Фарғона вилояти Ўзбекистон туманида хотини ва икки ёшли қизини ўлдирган эркак 19 йил муддатга озодликдан маҳрум этилди. Суд уни қасддан одам ўлдиришда айбдор деб топди.
Тергов маълумотларига кўра, воқеа 2025 йил 3 ноябрь куни содир бўлган. Маст ҳолатда бўлган эркак қайнонаси уйига келиб, у ерда яшаб келаётган турмуш ўртоғига ҳужум қилган.
Аёл аввалроқ алимент ундириш учун судга мурожаат қилган бўлиб, суд қарорига асосан эркак 15 суткага қамалганди. Озодликка чиққанидан сўнг у алимент тўлашдан қочиш мақсадида жиноят содир этгани аниқланган.
Маълум қилинишича, у бошқа болалар кўз ўнгида хотинига ошхона пичоғи билан бир неча марта зарба берган, сўнг икки ёшли қизига ҳам пичоқ урган.
Қизалоқ воқеа жойида вафот этган. Аёл эса шифохонага олиб кетилаётганида йўлда жон берган.
Жиноят содир этилгандан сўнг эркак воқеа жойидан қочган, аммо кейинчалик қўлга олинган.
Суд уни Жиноят кодексининг 97-моддаси 2-қисми "а", "в", "ж", "и" бандлари билан айбдор деб топиб, умумий тартибдаги колонияда 19 йилга озодликдан маҳрум қилиш жазосини тайинлаган.
Эслатиб ўтамиз, Сирдарё вилоятининг Ширин шаҳрида юз берган оилавий низо ҳам қотиллик билан якунланиб, икки инсоннинг ҳаётига зомин бўлганди. Рашк ва ўзаро келишмовчилик ортидан содир бўлган ҳужум оқибатида она ва унинг вояга етмаган фарзанди воқеа жойида вафот этган, яна бир кичик ёшли қизча эса оғир аҳволда шифохонага ётқизилган эди.
Изоҳлар мавжуд емас