Ўзбекистон, Тошкент - Batafsil.uz. Туркияда турмушга чиқиб, уч кунлик дабдабали тўйдан сўнг 5 миллион лиралик (деярли 103 минг доллар) тилла тақинчоқлар, нақд пул ва телефонни олиб қочганликда айбланган ўзбекистонлик аёл айбловларни кескин рад этди. У ҳеч қаерга яширинмаганини билдириб, ўз хоҳиши билан полицияга борди ва қайнотаси тиллаларни ўз қарзларини ёпиш учун сотиб юборганини исботловчи далилларни тақдим этди.
Аёлнинг сўзларига кўра, турк фуқароси билан танишув 2026 йилнинг март ойида, у Туркияга бир йил олдин оила қурган онасини йўқлаб борган вақтида бошланган. Икки томоннинг қариндошлари орқали бошланган муносабатлар май ойи охирида унаштирув ва хужжатларни расмийлаштириш билан давом этган.
Тўй маросимлари жорий йилнинг 18–20 август кунлари Муғла вилоятининг Милас туманида бўлиб ўтган. Келиннинг таъкидлашича, маҳаллий урф-одатларга кўра унга 16 та Ататурк тангаси, 12 та билакузук ва соат тақилган. Бу буюмларнинг умумий қиймати куёв даъво қилганидек 5 миллион лира эмас, балки 1–1,5 миллион лира атрофида бўлган.
Ўзбекистонлик аёлнинг таъкидлашича, тўйнинг эртаси куниёқ куёвнинг қариндошлари ўғирликдан хавфсираб жанжал кўтаришган. Шу сабабли келин ва унинг онаси барча заргарлик буюмларини дарҳол қайнотага топширишган.
"Мен ҳеч нарсани олиб қочганим йўқ. Қайнотамнинг ўзи ушбу қимматбаҳо буюмларни шахсий кредитлари ва қарзларини ёпиш учун сотганини ёзишмаларда очиқ айтган", — дейди аёл.
Интернетда тарқалган айбловлардан сўнг аёл Милас тумани полиция бўлимига ихтиёрий ўзи бориб, кўрсатма берган ва прокурор қабулида бўлган. У ҳуқуқни муҳофаза қилувчи органларга қайнотаси билан ёзишмалари ҳамда тилла буюмлар топширилган лаҳзалар муҳрланган видеоёзувларни тақдим этган.
Келиннинг қайнотаси Мустафо Атошоғлу тўйдаги курашларни ташкил этишнинг ўзи учун 1,5 миллион лира сарфлаганини айтган ва уни тилларини ўғирлаганликда айблаган.
"Кетган пулнинг ортидан қувмаяпман. Мен ор-номусим ва ғурурим ортидан қувяпман", — деган у.
Ҳозирда Туркия ҳуқуқ-тартибот органлари тақдим этилган далиллар асосида ҳолат юзасидан расмий суриштирув ишларини олиб бормоқда.
Изоҳлар мавжуд емас