Ўзбекистон, Тошкент - Batafsil.uz. Жиноят ишлари бўйича Узун туман суди ўз норасмий турмуш ўртоғи ва 5 ойлик фарзандини бир неча ой давомида ғайриинсоний шароитда, яширинча сақлаб келган эркак ва унинг яқин қариндошларига нисбатан жазо тайинлади.
Сентябрь ойида ижтимоий тармоқларда сурхондарёлик ёш она ва болага нисбатан зўравонлик содир этилгани ҳақида шов-шувли хабар тарқалганди. Улар бир неча ой давомида молхонада сақланган.
Вилоят ИИБ ҳолатга муносабат билдириб, аёл озод этилгани ва воқеага алоқадорлар қўлга олинганини маълум қилган эди.
Маълум бўлишича, 1981 йилда туғилган эркак ўз онаси ва бошқа қариндошлари билан тил бириктириб, руҳий ҳолатида ўзгаришлар бўлган норасмий турмуш ўртоғи ва унинг гўдагини хонадон ичидаги молхонада санитария қоидаларига зид ҳолатда мажбурлаб сақлаб келган.
Мажбурий ушлаб туриш тўғрисидаги хабар 26 август куни органларга келиб тушган. Воқеа жойига зудлик билан етиб келган профилактика инспектори уй эгасининг қаршилигига қарамай, молхона эшигини бузиб кирган. Ичкарида 28 ёшли аёл - унинг норасмий рафиқаси бўлган. Унинг ёнида беш ойлик ўғли ҳам бор эди. Уларнинг иккиси ҳам зудлик билан шифохонага олиб кетилган. Жабрланувчи жон сақлаш учун чорва озуқаси ва тарвуз пўчоғини ейишга мажбур бўлган.
Аниқланишича, жабрланувчининг нутқида нуқсон борлиги ва фикрини тўлиқ баён қила олмаслигидан фойдаланган айбдорлар, унга нисбатан мунтазам равишда руҳий ва жисмоний тазйиқ ўтказиб келишган.
Шу сабабли асосий айбланувчи эркакга нисбатан Жиноят кодексининг бир қатор моддалари (оилавий зўравонлик, озодликдан маҳрум қилиш ва бошқалар) билан жазо тайинланиб, 13 йил муддатга озодликдан маҳрум қилинган.
Унинг жиноий шериклари бўлган икки аёл эса 9 йилдан озодликдан маҳрум этиш жазосига ҳукм қилинган.
Яна бир 74 ёшли аёл кексалиги инобатга олиниб, 5 йил муддатга озодликни чеклаш жазоси тайинланган.
Ҳозирда жабрланувчилар тиббий муассасаларда даволанмоқда. Уларнинг соғлиғи ва ижтимоий ҳимояси вилоят масъуллари томонидан алоҳида назоратга олинган.
Изоҳлар мавжуд емас