Ўзбекистон, Тошкент - Batafsil.uz. Ижтимоий тармоқларда сурхондарёлик ёш она ва болага нисбатан зўравонлик содир этилгани ҳақида шов-шувли хабар тарқалди. Улар бир неча ой давомида молхонада антисанитария шароитида сақланган. Вилоят ИИБ ҳолатга муносабат билдириб, аёл озод этилгани ва воқеага алоқадорлар қўлга олинганини маълум қилди.
Мажбурий ушлаб туриш тўғрисидаги хабар 26 август куни органларга келиб тушган. Воқеа жойига зудлик билан етиб келган профилактика инспектори уй эгасининг қаршилигига қарамай, молхона эшигини бузиб кирган. Ичкарида 28 ёшли аёл - унинг норасмий рафиқаси бўлган. Унинг ёнида беш ойлик ўғли ҳам бор эди. Уларнинг иккиси ҳам зудлик билан шифохонага олиб кетилган.
Суриштирув давомида маълум бўлишича, уй эгаси бир неча ой давомида аёлни молхонада яширинча сақлаб келган. Хабар қилинишича, у аёлнинг нутқида нуқсони борлиги ва шу сабабли ўз фикрларини тўлиқ ифода эта олмаслигидан фойдаланган. Вазиятдан унинг онаси ва у билан бирга яшайдиган бошқа яқин қариндошлари хабардор бўлган.
Айни пайтда аёл Узун туманидаги шифохонанинг жарроҳлик бўлимида, чақалоқ эса чақалоқлар бўлимида даволанмоқда. Уларнинг аҳволи вилоят ижтимоий ҳимоя бошқармаси масъуллари томонидан қатъий назоратга олинган.
Мазкур ҳолат юзасидан Жиноят кодексининг 126-1-моддаси (оилавий зўравонлик) 7-қисми "а" ва "э" бандлари билан жиноят иши қўзғатилган. Айбланувчилар - ишга алоқадор бўлган эркак ва унинг қариндошлари қўлга олинган.
Жиноят иши Сурхондарё вилояти ИИБ томонидан қатъий назоратга олинган.
Аввалроқ ИИВ Ўзбекистонда аёлларга нисбатан зўравонлик кучайиши сабабларини тушунтирганди.
Изоҳлар мавжуд емас