Ўзбекистон, Тошкент - Batafsil.uz. Учтепа тумани жиноят ишлари бўйича суди кўчада аёл кишига нисбатан шилқимлик қилган ва жамоат тартибини бузган шахсга нисбатан ҳукм чиқарди.
2026 йил 8 январь куни бўлиб ўтган суд жараёнида маълум бўлишича, ҳуқуқбузар Навоий номидаги театрнинг хор артисти бўлиб чиққан. Воқеа Лутфий кўчасида содир бўлган. Маст ҳолатда бўлган 32 ёшли эркак йўловчилар кўз ўнгдида ечиниб, уятсиз ҳаракатлар қилган ҳамда атрофдагиларни ҳақоратлаган.
Ҳуқуқбузар бекатда турган аёлни таъқиб қилган, сўнгра ер ости ўтиш йўлида унинг йўлини тўсиб, жинсий характердаги ҳаракатларни содир этган. Жабрланувчи ўзини ҳимоя қилиш учун куч ишлатишга мажбур бўлган.
Эркак майда безорилик, жинсий шилқимлик ва ички ишлар ходимларининг қонуний талабларига бўйсунмасликда айбдор деб топилган.
Суд қарори билан унга 15 сутка маъмурий қамоқ жазоси тайинланган. Шунингдек, у 2 миллион сўмдан ортиқ жарима тўлайдиган бўлган.
Мазкур ҳолат ижтимоий тармоқларда жабрланувчининг видеомурожаати тарқалганидан сўнг Тошкент шаҳар ИИББ томонидан тезкорлик билан ўрганилган ва гумонланувчи қўлга олинган эди.
Ҳозирда жабрланувчи аёлга расмий равишда ҳимоя ордери расмийлаштирилган.
Изоҳлар мавжуд емас