Ўзбекистон, Тошкент - Batafsil.uz. Жорий йилнинг 15 ноябрь куни Тошкентда балиқчилар сувда кичик Нил тимсоҳини кўриб қолди. Мутахассислар ҳайвонни хавфсиз тарзда ушлаб, Тошкент ҳайвонот боғига олиб борган.
Мутахассислар тимсоҳ топилган ҳудудни ҳам текшириб, яқин атрофда бошқа судралиб юрувчилар йўқлигига ишонч ҳосил қилган. Бошқа ҳайвонлар аниқланмаган.
Ҳайвонот боғи маълумотига кўра, Нил тимсоҳи Африка қитъасидаги сув ҳавзаларида яшайдиган йирик судралиб юрувчилардан бири ҳисобланади.
Вояга етганлари узунлиги 5–6 метргача етиши, 50 йилдан ортиқ яшаши мумкин. Унинг озуқаси балиқлар ва сувда яшовчи майда жониворлардан тортиб, йирик ҳайвонларгача бўлиши мумкин.
Таъкидлаш жоизки, 2025 йил июнь ойида ҳам Тошкентда бир фуқаро уйида Нил тимсоҳини сақлаётгани аниқланган. Ўша вақтда ҳайвон Тошкент ҳайвонот боғига топширилган, уни ноқонуний сақлаган шахсга нисбатан маъмурий баённома расмийлаштирилиб, материаллар судга юборилган.
Бироқ бу ҳолатнинг 15 ноябрь куни топилган тимсоҳга алоқаси борлиги ҳақида ҳозирча маълумот йўқ.
Бундай ҳайвонлар Экология вазирлигининг рухсатномаси асосида фақат юридик шахслар ташкил этган ҳайвонот боғлари ва махсус питомникларда сақланиши мумкин. Бунинг учун уларни сақлаш шароитлари ва эгалик қилиш қонунийлигини тасдиқловчи ҳужжатлар бўлиши керак.
Олдинроқ Фарғонада кўп қаватли уй ертўласида акула боқилаётгани аниқланганди.

Изоҳлар мавжуд емас