Ўзбекистон, Тошкент - Batafsil.uz. Ижтимоий тармоқларда тарқалган видеомурожаатда жабрланувчи аёлнинг отаси, куёви томонидан қизига нисбатан бир неча марта зўравонлик содир этилганини иддао қилмоқда. Унинг айтишича, охирги ҳолатда қизи шиша парчалари билан танасининг турли жойларидан жароҳатланган ва оғир аҳволда ташлаб кетилган.
Мурожаат муаллифининг сўзларига кўра, уч ой аввал ҳам куёви қизининг жағини ва тишларини синдирган. Ўшанда у уч нафар невараси борлиги учун куёвини кечирганини, бу воқеадан ички ишлар органлари ҳам хабардор бўлганини таъкидлаган.
Отанинг иддао қилишича, сўнгги воқеада куёви қизининг юзи ва танасининг бир нечта жойига шиша парчалари билан жароҳат етказган. Шундан сўнг аёлни қонга беланган ҳолда уйига олиб келган. Унинг айтишича, қизи шифохонага олиб борилишини сўраганда, қайнонаси бунга рози бўлмаган ва "уйимизни шарманда қиляпсанми, ўзим даволайман", деган.
Шундан кейин, мурожаатга кўра, қайнонаси бошқа қариндошини чақирган. Орадан тахминан ярим соатдан бир соатгача вақт ўтгач, қон йўқотаётган аёлни шифохонага олиб кетиш баҳонасида машинага ўтқазишган. Йўл давомида унга "йиқилиб тушдим", деб айтиш кераклиги уқтирилгани, турли ҳақоратлар қилингани ва руҳий босим ўтказилгани айтилган.
Отанинг таъкидлашича, шундан сўнг қизини Мирзаариқ канали устидаги кўприк ёнига олиб бориб, унга ўзини ўлдиришни айтганлар ва ўша ерда ташлаб кетганлар. Унинг сўзларига кўра, қўшниси Бахтиёр исмли шахс тасодифан кўриб қолиб, қизини шифохонага етказган.
Мурожаат сўнгида эркак ички ишлар органларидан ҳолатга ҳуқуқий баҳо беришни сўраган. У куёвига нисбатан тан жароҳати етказиш билан боғлиқ, қариндошига нисбатан эса ўз жонига қасд қилишга ундаш билан боғлиқ моддалар асосида жиноят иши қўзғатилишини талаб қилган.
Аввалроқ Самарқанд вилоятида яшовчи эркак турмуш ўртоғини ўз жонига қасд қилиш даражасига етказганликда айбдор деб топилиб, суд ҳукми билан 9 йил 6 ой муддатга озодликдан маҳрум қилинганди. Суд жараёнида эълон қилинган материаллар оилада узоқ вақт давом этган зўравонлик, изоляция ва мунтазам жанжаллар ҳақидаги ҳолатларни очиб берган эди.
Изоҳлар мавжуд емас