Ўзбекистон, Тошкент - Batafsil.uz. АҚШ ҳарбий кучлари Эрон ҳудудига ҳаво зарбалари беришни давом эттирди ва бу сафар ҳужумлар илк бор мамлакат шимолига ҳамда пойтахт Теҳрон яқинидаги ҳудудларга қадар етиб борди. Бунга жавобан Эрон армияси Қувайт, Баҳрайн ва Иорданиядаги АҚШ ҳарбий объектларини нишонга олганини маълум қилди. Сўнгги тўқнашувлар оқибатида камида 35 киши ҳалок бўлди ва 300 дан ортиқ киши жароҳатланди.
АҚШ Марказий қўмондонлиги (CENTCOM) Ҳормуз бўғози орқали ўтаётган тижорий кемалар хавфсизлигини таъминлаш ва блокадани кучайтириш мақсадида Эрондаги ҳарбий объектларга янги ҳаво зарбалари тўлқинини уюштирган. Ҳужумлар натижасида Аҳвоз шаҳридаги шифохоналардан бирига шикаст етган ва у ердан 211 нафар бемор зудлик билан эвакуация қилинган.
Шунингдек, АҚШ кучлари томонидан Бандар-Аббос, Қешм ороли, Сирик, Чабаҳар, Конарак, Раск, Хондаб, Хоррамабод ва Семнан шаҳарларидаги қўмондонлик марказлари, ҳаво ҳужумидан мудофаа тизимлари ва ракета омборлари бомбардимон қилинган. Катта Тунб оролидаги ракета базалари ҳам кучли ҳужум остида қолган бўлса, иқтисодий чекловлар доирасида Эроннинг Харг оролига қараб ҳаракат қилган бўйсунмас нефть танкери Hellfire ракеталари билан ишдан чиқарилган.
Ҳужумлар ортидан Теҳрон, Пакдашт ва Парчин шаҳарларида ҳаво ҳужумидан мудофаа тизимлари ишга тушган ва Эрон ҳарбийлари Андимешк шаҳри осмонида АҚШнинг MQ-9 дронини уриб туширганликларини эълон қилишган.
Бунга жавобан Эрон армияси қўшни Кўрфаз давлатларидаги АҚШ ҳарбий базаларига шиддатли зарбалар берди. Хусусан, Қувайтдаги "Али ал-Салем" авиабазасида жойлашган АҚШ кучларига тегишли радарлар, Patriot ҳаво ҳужумидан мудофаа тизимлари ва ёқилғи омборлари нишонга олинган. Баҳрайннинг "Шайх Иса" авиабазасидаги Super Hawk радарлари ва Patriot тизимларига дронлар орқали ҳужум уюштирилган.
Айни пайтда Иордания ўз ҳудудига учиб кирган 8 та Эрон ракетасини уриб туширганини маълум қилган бўлса, Ироқнинг Эрбиль шаҳридаги АҚШ базаси ва консуллиги яқинига 5 та дрон ҳужум қилган, бироқ Эрон бу ҳужумлар учун жавобгарликни расман ўз зиммасига олгани йўқ.
Можаролар фонида сиёсий доираларда кескин баёнотлар янграмоқда. Эрон Парламенти раиси Муҳаммад Ғолибаф мамлакат ўз мавжудлиги учун курашаётганини ва АҚШ оралиқ келишув шартларини бажармаса, кенг кўламли урушга тайёрлигини таъкидлаган. Ислом инқилоби қўриқчилари корпуси эса АҚШ блокадаси туфайли Яқин Шарқдан барча энергия экспортини бутунлай тўхтатиб қўйиш билан таҳдид қилган.
Ўз навбатида, АҚШ Президенти Дональд Трамп Эрон саҳна ортида тинчлик битимига эришишга интилаётганини даъво қилиб, урушни бутунлай тугатиш ёки келишувга эришиш зарурлигини билдирган.
Шу билан бирга, кеча Трамп 2024 йилдан бери Эронда ҳибсда сақланаётган АҚШ фуқароси Дена Карирининг озод этилгани учун Теҳронга миннатдорчилик билдирганди. АҚШ вице-президенти Жей Ди Вэнс ҳам ушбу ҳарбий ҳаракатларни ҳимоя қилиб, можарога чек қўйиш учун икки томон ўртасида янги келишув зарурлигини урғулаган.
Изоҳлар мавжуд емас