Ўзбекистон, Тошкент - Batafsil.uz. Исроил Миллий хавфсизлик вазири Итамар Бен-Гвир Ғазо секторидаги барча 2 миллионга яқин фаластинликларни хорижга мажбурий кўчириб юборишга қаратилган 7 йиллик режасини эълон қилди. Унга кўра, биринчи йилнинг ўзида 250 минг аҳолини чиқариб юбориш ва бунинг учун мамлакатда алоҳида "Кўчиб кетиш бўйича вазирлик" ташкил этиш кўзда тутилган.
Ушбу таклиф "Ғазо секторидан ихтиёрий равишда кўчиб кетиш бўйича миллий иш режаси" номли 20 саҳифалик ҳужжатда ўз аксини топган. "Ихтиёрий" сўзи қўлланилган бўлса-да, Исроил томонидан яратилган оғир яшаш шароитлари сабабли халқаро ҳамжамият буни очиқдан-очиқ мажбурлаш сифатида баҳоламоқда.
Женева конвенциясига кўра, босиб олинган ҳудудлардан тинч аҳолини мажбурий кўчириш уруш жинояти ҳисобланади. Бундан ташқари, яқинда БМТнинг мустақил комиссияси Исроилни Ғазода геноцид содир этаётганликда айблаган.
Бен-Гвирнинг чиқиши Мудофаа вазири Исраэль Кацнинг баёнотлари фонида юз бермоқда. Кац ҳам Исроил фаластинликларни кўчиришни "ҳар қандай йўл билан" енгиллаштиришини ва бу борада АҚШ администрацияси билан муҳокамалар кетаётганини шаъма қилган. Бош вазир Биньямин Нетаньяху эса Ғазодаги ҳарбий базага ташрифи чоғида Исроил эгаллаб олинган ҳудудлардан чиқмаслигини ва айни пайтда анклавнинг 60 фоиздан ортиғини назорат қилаётганини билдирган.
27 октябрда кутилаётган сайловлар олдидан Бен-Гвир радикал сайловчиларни жалб қилиш учун бир қатор шов-шувли баёнотлар бермоқда. Ирқчиликка даъват ва террористик ташкилотни қўллаб-қувватлагани учун муқаддам судланган ва халқаро санкцияларга тушган ушбу сиёсатчи, шунингдек, давлатга "содиқ бўлмаган" депутатлар ва фуқароларни ҳам мамлакатдан депортация қилиш сиёсатини илгари суришини маълум қилган.
Хорижий сўровномаларига кўра, унинг "Яҳудий кучи" партияси бўлажак парламентда 7 тага яқин ўринни эгаллаши кутилмоқда.
Эслатиб ўтамиз, АҚШ президенти Дональд Трамп ҲАМАС ва бошқа фаластинлик гуруҳлар Ғазо секторида қуролсизланиш режасини назарда тутувчи ҳужжатни қабул қилинганини маълум қилганди.
Изоҳлар мавжуд емас