Ўзбекистон, Тошкент - Batafsil.uz. Бирлашган Араб Амирликлари нефть экспорт қилувчи араб давлатлари ташкилоти — ОАПЕК таркибидан чиқди. Мамлакатнинг бу қарори 2026 йил 1 майдан кучга киргани расман тасдиқланди.
ОАПЕК баёнотида қайд этилишича, ташкилот бош котибияти БАА энергетика вазири Суҳайл ал-Мазруи томонидан юборилган расмий мактубни қабул қилган. Унда Амирликлар ҳукуматининг ташкилот таркибидан чиқиш тўғрисидаги қарори баён этилган.
Маълум қилинишича, мазкур қадам БААнинг аввал ОПЕК ҳамда ОПЕК+ альянсидан чиқиш қарорлари ортидан амалга оширилган. Шу тариқа, мамлакат нефть бозоридаги халқаро келишув ва координация механизмларидан босқичма-босқич чиқиб кетмоқда.
ОАПЕК 1968 йилда ташкил этилган бўлиб, араб давлатлари ўртасида нефть сиёсати, ҳамкорлик ва тармоқ ривожини мувофиқлаштиришга қаратилган. БАА эса 58 йил давомида ушбу ташкилот аъзоси сифатида фаолият юритиб келган.
Мутахассислар фикрича, Амирликларнинг бу қарори мамлакатнинг нефть ишлаб чиқариш ва экспорт сиёсатида мустақилликни ошириш, бозор шароитларига мослашувчанликни кучайтиришга қаратилган бўлиши мумкин. Шу билан бирга, бу ўзгаришлар глобал нефть бозоридаги кучлар мувозанатига маълум даражада таъсир кўрсатиши эҳтимолдан холи эмас.
Аввалроқ, БАА 2026 йил 1 майдан бошлаб ОПЕК ва ОПЕК+ альянсидан ҳам чиққанини маълум қилган эдик.
Изоҳлар мавжуд емас