Эрон олий раҳбари Оятуллоҳ Али Хоманаий ўз халқига мурожаат қилди

Ўзбекистон, Тошкент - Batafsil.uz. Бугун, 9 январь куни Эрон давлат телевидениеси олий раҳбар Оятуллоҳ Али Хоманаийнинг мамлакат бўйлаб авж олаётган норозилик намойишларига бағишланган фавқулодда нутқини намойиш этди. Бу нутқ расмийлар мамлакатни ташқи дунёдан деярли бутунлай узиб қўйган бир шароитда янгради. NetBlocks халқаро интернет мониторинги хизматига кўра, Эронда сўнгги 12 соат давомида интернет алоқаси мавжуд эмас.

Унинг айтишича, Американинг қўллари 1000 дан ортиқ эронликларнинг, жумладан, раҳбарлар ва бегуноҳ одамларнинг қони билан бўялган ва Эрон қатъиятлидир ва ўз тамойилларидан бир зарра ҳам чекинмайди.

Шу билан бирга бирлашган мамлакат халқи барча душманлар устидан ғалаба қозонишини, қўли Эрон халқи қонига бўялган Трамп уялмасдан "мен Эрон миллатининг тарафдориман" деяётганлиги, бунга бир тўда тажрибасиз, бепарво ва узоқни кўролмайдиган одамлар ишониб, уни қабул қилаётгани ва унинг хоҳишларига мувофиқ ҳаракатланаётганини таъкидлаган.

Норозилик тўлқини сургундаги валиаҳд шаҳзода Ризо Паҳлавийнинг эронликларни кўчаларга чиқишга чорловидан сўнг янги босқичга кўтарилган. Айни дамда Эрон ҳукумати намойишларни жиловлаш учун интернет ва халқаро телефон алоқасини бутунлай ўчириб қўйган, бу эса халқаро ҳамжамиятга вазиятни холис баҳолашга тўсқинлик қилмоқда.

Ҳуқуқ фаолларига кўра, тўқнашувларда камида 42 киши ҳалок бўлган, 2270 дан ортиқ киши ҳибсга олинган.

1979-йилги Ислом инқилобидан сўнг мамлакатдан чиқиб кетган валиаҳд шаҳзода Ризо Паҳлавийнинг намойишларга чақириғи кўпчиликни ҳайратда қолдирган. Теҳрон кўчаларида "Паҳлавий қайтиб келади!" ва "Диктаторга ўлим!" каби шиорлар янграётгани кузатилган.

АҚШ Президенти Дональд Трамп намойишчиларга қарши зўравонлик ишлатилса, Теҳрон "жаҳаннам жазосини" ўташини айтди. У, шунингдек, олий раҳбар Хоманаий мамлакатни тарк этиш ҳақида ўйлаётган бўлиши мумкинлиги ҳақидаги тахминларни илгари сурган.

Эрон расмий ОАВлари содир бўлаётган воқеаларни АҚШ ва Исроилнинг "террорчи агентлари" томонидан уюштирилган провокация деб атамоқда. Уларнинг таъкидлашича, намойишчилар давлат мулки ва жамоат транспортига атайлаб ўт қўйган.

Эроннинг ўнлаб шаҳарларида оятуллоҳлар режимига қарши мисли кўрилмаган исён бир неча кундан бери давом этмоқда. Намойишчилар нафақат кўчаларга чиқишмоқда, балки стратегик нуқталарни эгаллаб, ҳукумат кучларига фаол қаршилик қилмоқда.