Ўзбекистон, Тошкент - Batafsil.uz. Эрон ва АҚШ ўртасида Женевада бўлиб ўтган билвосита музокараларнинг иккинчи раунди якунларига кўра, томонлар бўлажак келишувнинг асосий йўналишлари ва тамойиллари бўйича умумий келишувга эришди. Эрон Ташқи ишлар вазири Аббос Аракчининг маълум қилишича, музокараларда сезиларли илгарилаш кузатилган ва эндиликда томонлар келишувнинг расмий матнини лойиҳалаш босқичига ўтишга тайёр.
Дастлаб, 6 февраль куни Уммонда бўлиб ўтган илк алоқалар "умуман олганда ижобий" кечган, бироқ якуний хулоса чиқаришга ҳали эрталиги таъкидланган эди. Теҳрон агар Вашингтон санкцияларни бекор қилиш масаласини жиддий муҳокама қилишга тайёр бўлса, ядровий келишув бўйича муайян келишувларга тайёрлигини билдирган.
Кеча, 17 февраль куни, Женевадаги Уммон элчихонасида бўлиб ўтган учрашувлар жиддий ва конструктив муҳитда ўтди. Аракчининг таъкидлашича, техник жиҳатлар бўйича муҳокамалар асосий учрашувдан бир кун олдин бошланган. Шунингдек, жараён доирасида Атом энергияси бўйича халқаро агентлик (МАГАТЭ) бош директори Рафаэль Гросси билан ҳам самарали мулоқот ўтказилган.
Музокаралар якунида ҳар икки томон бўлажак келишув лойиҳалари устида алоҳида ишлаш, тайёрланган лойиҳаларни ўзаро алмашиш, ҳужжатлар алмашинувидан сўнг музокараларнинг учинчи раунди санасини белгилашга келишиб олди.
Эрон ТИВ раҳбари йўл энди бошланганини ва матнни деталлаштириш босқичи энг қийин жараён бўлишини таъкидлаган. Ҳозирча аниқ "йўл харитаси" мавжуд эмас, бироқ томонларда келгуси қадамлар бўйича олдингига қараганда анча тиниқ тасаввур шаклланган.
Маълумот учун, Эрон ва АҚШ ўртасидаги билвосита музокаралар жорий йилнинг 6 февралида Маскат шаҳрида қайта тикланган бўлиб, унда Уммон Ташқи ишлар вазири воситачилик қилмоқда.
Изоҳлар мавжуд емас