Францияда круиз кемасидаги 1700 дан ортиқ одам карантинга олинди

Ўзбекистон, Тошкент - Batafsil.uz. Франциянинг Бордо шаҳрида тўхтаб турган круиз кемасида норовирус гумони билан боғлиқ касалланишлар аниқланганидан сўнг 1700 дан ортиқ йўловчи ва экипаж аъзоси карантинга олинди. Ambassador Cruise Line маълумотига кўра, Ambition кемасида ҳозирда 48 нафар йўловчи ва бир нафар экипаж аъзосида ошқозон-ичак касаллиги белгилари қайд этилган.

Касаллик норовирус билан боғлиқ бўлиши мумкинлиги айтилмоқда. Шунингдек, 90 ёшли бир йўловчи вафот этган. Унинг ўлими сабаби ҳозирча расман тасдиқланмаган.

Кемада жами 1187 нафар меҳмон ва 514 нафар экипаж аъзоси бўлиб, уларнинг аксарияти Буюк Британия ва Ирландия фуқаролари ҳисобланади. Кема 13 май куни Франциянинг Бордо шаҳрига етиб келганидан сўнг соғлиқни сақлаш идоралари томонидан текширув бошланган.

Франция соғлиқни сақлаш хизмати ва тегишли мутахассислар лаборатория таҳлиллари учун намуналар олган. Тергов ва текширувлар якунлангунга қадар барча йўловчи ва экипаж аъзоларига кема ичида қолиш бўйича кўрсатма берилган.

Компания маълум қилишича, касалланиш ҳолатлари 9 май куни, кема Англиянинг Ливерпуль шаҳридан йўлга чиққанидан кейин кўпайган. Илк саёҳат эса Белфастдан бошланган бўлиб, у 14 кунлик круиз сифатида режалаштирилган эди.

Касаллик тарқалишидан кейин барча қирғоқ экскурсиялари бекор қилинган ва йўловчиларга пуллари қайтарилиши билдирилган. Ошқозон-ичак касалликлари бўйича тиббий хизматлар эса бепул кўрсатилмоқда.

Мутахассислар таъкидлашича, норовирус жуда юқумли бўлиб, одамлар зич жойлашган муҳитда тез тарқалади. Шу сабабли круиз кемалари бундай инфекциялар учун хавфли ҳудудлардан бири ҳисобланади.

Норовирус — бу ошқозон ва ичакларнинг кескин яллиғланишини (гастроэнтерит) келтириб чиқарадиган, жуда юқумли вирусли инфекциядир. У одатда "ошқозон гриппи" деб аталади, бироқ грипп вирусига алоқаси йўқ.

Аввалроқ бортида хавфли хантавирус инфекцияси қайд этилган "Хондиус" круиз кемаси Канар оролларини тарк этганди. Тенерифе портида йўловчиларнинг асосий қисмини кенг кўламли эвакуация қилиш якунлангач, кема чуқур санитар тозалашдан ўтиш учун Нидерландияга йўл олган. Эвакуация якунланганига қарамай, кема бортида қатъий карантин шароитида 27 киши қолмоқда.