Ўзбекистон, Тошкент - Batafsil.uz. Нью-Йоркдаги Таймс-сквер майдонида икки ошхона пичоғи билан қуролланган аёл 32 ёшли Bank of America вице-президенти Эрин Пьячентини пичоқлаб ўлдирди. Ҳужумда яна 68 ёшли эркак оғир яраланган, ҳужумчи эса полиция ходимларига ташланганидан сўнг отиб ўлдирилган.
Ҳодиса 31 август куни содир бўлган. Нью-Йорк полицияси маълум қилишича, 49 ёшли Памела Сиснерос дастлаб метро чиқишида бўлган 68 ёшли сайёҳга пичоқ билан ҳужум қилган. Эркакнинг ҳаёти шифокорлар томонидан сақлаб қолинган, аммо унинг аҳволи оғир ва беқарор деб баҳоланмоқда.
Шундан сўнг аёл 32 ёшли Эрин Пьячентига ҳужум қилиб, унинг қорнига пичоқ урган. Жабрланувчи воқеа жойида ҳалок бўлган.
Полиция ходимлари ҳужумчини воқеа жойи яқинида қуршаб олган ва тахминан тўрт дақиқа давомида ундан пичоқларни ташлашни талаб қилган. Бироқ аёл полициячиларга ҳам ташланган. Электрошокерлардан фойдаланиш ҳам уни тўхтатмаганидан сўнг ҳуқуқ-тартибот ходимлари унга қарата ўқ узган.
Полиция маълумотларига кўра, Сиснерос аввал ҳеч қачон ҳибсга олинмаган. Бироқ 2018 ва 2019 йилларда унда руҳий саломатлик билан боғлиқ ҳолатлар қайд этилган.
Ҳалок бўлган Эрин Пьяченти Нью-Жерсида туғилган. У 2016 йилда Пенсильвания университетини, 2021 йилда эса Фордхэм университетининг ҳуқуқ факультетини тамомлаган. Сўнгги вақтларда Bank of Americaда манфаатлар тўқнашувини ҳал қилиш йўналишида вице-президент лавозимида ишлаган.
Нью-Йорк мэри Зохран Мамдани полиция ҳодиса юзасидан ички текширув ўтказиши ва ходимларнинг боди-камераларидаги видеоларни эълон қилишини маълум қилган. Bank of America вакиллари эса ходимининг ўлими муносабати билан унинг оиласи ва яқинларига ҳамдардлик билдирган.
Бундан олдин Шимолий Ирландиянинг Белфаст шаҳрида содир этилган пичоқли ҳужумдан сўнг муҳожирларга қарши намойишлар ва тартибсизликлар кузатилганди. Бунга 30 ёшли Судан фуқароси 40 ёшлар атрофидаги эркакка пичоқ билан ҳужум қилиб, унга бўйин, юз ва бош қисмига оғир жароҳат етказгани сабаб бўлган эди. Воқеа жойида ошхона пичоғи топилган.
Изоҳлар мавжуд емас