Ўзбекистон, Тошкент - Batafsil.uz. АҚШ Президенти Дональд Трамп Эрондаги урушнинг илк кунида қизлар мактабига берилган ва кўплаб болалар ўлимига сабаб бўлган ҳалокатли зарбада ким айбдор эканлиги ҳеч қачон аниқланмаслиги мумкинлигини билдирди. Оқ уй раҳбари ОАВ вакиллари билан учрашувда ушбу фожиа юз берган пайтда ҳар томондан ракеталар учирилаётганини рўкач қилган.
Эслатиб ўтамиз, урушнинг илк кунида Эрон жанубидаги Миноб шаҳрида жойлашган "Шажара Таййиба" бошланғич мактабига АҚШ ва Исроил томонидан берилган ҳарбий зарбалар оқибатида 168 нафар ўқувчи ҳалок бўлганди. Улардан 69 нафарининг шахсини ҳалигача аниқлаш имкони бўлмаган эди. Шунингдек, мактабда фаолият юритган 35 нафар ўқитувчидан 14 нафари ҳам ҳалок бўлган.
The New York Times агентлигининг март ойидаги ҳисоботида АҚШ ҳарбийларининг дастлабки ички суриштирувлари ушбу зарба учун айнан Америка кучлари жавобгар бўлиши мумкинлигини кўрсатгани ҳақида хабар берилган. Тахминларга кўра, фожиага АҚШ томонидан нишонни белгилашда эскирган маълумотлардан фойдаланилгани сабаб бўлган. Пентагон терговни кучайтирган бўлса-да, ҳозирча дастлабки хулосаларни расман тан олгани йўқ.
Трамп ўз баёнотида ушбу ракета АҚШга тегишли эканига ишонмаслигини ва буни тасдиқловчи ҳеч қандай далил кўрмаганини таъкидлаган. Халқаро гуманитар ҳуқуққа кўра, мактабга қасддан зарба бериш ҳарбий жиноят ҳисобланади. Шу боис АҚШ расмийлари Вашингтон ҳеч қачон таълим муассасасини атайлаб нишонга олмаслигини мунтазам билдириб келмоқда.
Бутун дунёда кескин норозилик уйғотган ва БМТ томонидан "дахшатли фожиа" деб баҳоланган ушбу ҳодиса бўйича суриштирув ишлари давом этмоқда. АҚШ Президенти тергов якунларини қабул қилишини ва мактабга "ҳеч ким қасддан" ҳужум қилмаганини қўшимча қилган.
Изоҳлар мавжуд емас