Ўзбекистон, Тошкент - Batafsil.uz. АҚШ Президенти Дональд Трамп Венесуэла мухолифати рамзига айланган Мария Корина Мачадога нисбатан муносабатини кескин ўзгартирди. Маълумотларга кўра, бунга Мачадонинг 2025 йилги Нобель тинчлик мукофотини қабул қилгани ва уни Трампга "топширмагани" сабаб бўлган.
The Washington Post нашрининг Оқ уйга яқин манбаларига таяниб хабар беришича, Трамп ушбу нуфузли мукофотни ўзи олишини интизорлик билан кутган. Мария Корина Мачадо 2025 йил октябрь ойида демократия йўлидаги кураши учун Нобель мукофотига лойиқ кўрилган эди. У мазкур мукофотга "Венесуэла халқининг демократик ҳуқуқларини тарғиб қилиш бўйича тинмасдан фаолият юритгани ва диктатурадан демократияга адолатли ҳамда тинч йўл билан ўтиш учун курашгани учун" муносиб деб топилганди. Мачадо совринни Трампга бағишлаган бўлса-да, уни шахсан қабул қилиши АҚШ Президенти томонидан "кечирилмас хато" сифатида қабул қилинган.
Манбалардан бирининг таъкидлашича, агар Мачадо мукофотдан воз кечиб, унинг ҳақиқий эгаси Дональд Трамп эканини айтганида, бугун у Вашингтон кўмаги билан Венесуэла президенти бўлиши мумкин эди.
Николас Мадуро қўлга олинганидан сўнг ўтказилган матбуот анжуманида Трамп Мачадо ҳақида совуққонлик билан фикр билдирган. У Мачадони шунчаки "ёқимли аёл" деб атаган. Мухолифат етакчисининг мамлакат ичида қўллаб-қувватланиши ва ҳурмати йўқлигини даъво қилган.
Мачадонинг Венесуэла раҳбари бўлиш имкониятларини паст деб баҳолаган.
Мачадонинг жамоаси Вашингтоннинг бундай кескин позициясидан шок ҳолатига тушган.
Кейинчалик Венесуэла мухолифати етакчиси Мачадо Fox news томонидан ташкиллаштирилган интервьюда "Бу Венесуэла халқининг мукофоти бўлгани учун, албатта, биз уни унга (Трампга) беришни ва у билан баҳам кўришни истаймиз" деган. Мачадо хоним 10 дақиқалик интервюнинг катта қисмини мухолифатни қўллаб-қувватлашдан бош тортган жаноб Трампга мурожаат қилиш билан ўтказган. У ҳатто унга октябрь ойида берилган Нобел тинчлик мукофотини ҳам таклиф қилган, бу мукофотни жаноб Трамп йиллар давомида орзу қилиб келган. Унинг сўзларига кўра, у мукофотни унга бағишлаганидан бери жаноб Трамп билан гаплашмаган.
Бу вақтда Европа Иттифоқи Венесуэладаги воқеаларга ўз муносабатини билдирган, бугун эса БМТ Хавфсизлик кенгашининг АҚШнинг Венесуэладаги ҳаракатлари юзасидан фавқулодда йиғилиши бўлиб ўтади.
Эслатиб ўтамиз, Венесуэланинг амалдаги етакчиси Николас Мадуро АҚШ суди олдида жавоб берди. Суд жараёнида у ўзининг айбсиз эканлигини таъкидлаб, ҳамон Венесуэланинг президенти эканини ва ўзини "ҳарбий асир" деб ҳисоблашини маълум қилганди.
Изоҳлар мавжуд емас