Ўзбекистон, Тошкент - Batafsil.uz. АҚШ президенти Дональд Трамп Венесуэлага қарши уруш бўлиши эҳтимолини кам деб баҳолади, аммо мамлакат президенти Николас Мадуронинг ҳокимиятдаги кунлари "саноқли" эканлигини айтди. Бу ҳақда у CBS телеканалига берган интервьюсида маълум қилган.
Венесуэлага ҳужумлар бўлиши эҳтимоли ҳақида сўралганда, "Мен ишонмайман, шундай деб ўйламайман, лекин улар бизга жуда ёмон муносабатда бўлишмоқда, фақат наркотик борасидагина эмас. Улар юз минглаб одамларни – биз қабул қилишни хоҳламаган, қамоқхоналардан чиққан одамларни – мамлакатимизга ташлаб кетишди", — деди Трамп.
Маълумотларга кўра, АҚШ ҳозирда Кариб денгизида гиёҳванд моддалар ташишда гумон қилинган кемаларга ҳаво зарбалари бермоқда. Вашингтон бу ҳаракатни "наркотик оқимини тўхтатиш учун зарур" деб ҳисоблайди.
Шу билан бирга, Трамп бу амалиётлар Мадурони ағдариш мақсадида эмас, балки "кўплаб омиллар" билан боғлиқ эканини таъкидлаган. Сентябрь бошидан буён Кариб ва Шарқий Тинч океани ҳудудларидаги АҚШ зарбалари оқибатида камида 64 киши ҳалок бўлган.
Флоридадаги Мар-а-Лаго қароргоҳидан гапирган Трамп ҳар бир йўқ қилинган кема 25 минг кишини гиёҳвандлик қурбони бўлишдан қутқараётганини, бу бутун мамлакат бўйлаб оилаларни вайрон бўлишдан асраётганини таъкидлаган.
Венесуэла президенти Николас Мадуро аввалроқ Вашингтонни "янги урушни уютиришда" айблаган, Колумбия президенти Густаво Петро эса АҚШни "Лотин Америкасини бўйсундириш учун баҳона излаётганликда" танқид қилган эди.
Аввалроқ АҚШ президенти Дональд Трамп наркотик картелларга қарши урушда янги босқичга ўтишини маълум қилганди.
Изоҳлар мавжуд емас