Ўзбекистон, Тошкент - Batafsil.uz. АҚШ президенти Дональд Трамп наркотик картелларга қарши урушда янги босқичга ўтишини маълум қилди. Унинг сўзларига кўра, ҳукуматнинг кейинги қадами денгиз ва ҳаво ҳужумларидан кейин қуруқликдаги операциялар бўлиши мумкин.
"Биз сувдаги ва ҳаводаги зарбаларни амалга оширдик. Кейинги босқич — қуруқликдаги ҳаракат. Бу урушда орқага чекиниш йўқ", — деди Трамп матбуот анжуманида.
Президентнинг бу баёноти охирги ҳафталарда АҚШ ҳарбий кучлари Кариб денгизи ва Тинч океанида "наркотик траффикка алоқадор" деб топилган бир неча кемаларга зарба берганидан сўнг янгради.
Америка етакчиси, шунингдек, Конгрессдан расмий уруш эълонини сўрамаслигини билдирди. Унинг таъкидлашича, наркотиклар билан шуғулланувчи картеллар мақоми "террорчи гуруҳлар"га тенг бўлиб, уларга қарши ҳаракатлар миллий хавфсизлик чораси ҳисобланади.
"Мен Конгрессдан уруш эълонини сўрамайман. Биз мамлакатимизга заҳар олиб кирадиганларни йўқ қиламиз. Улар учун баҳона бўлмайди", — деди у.
Шу билан бирга, Трамп Венесуэла ҳудудида фаолият юритувчи картелларни ҳам "асосий таҳдидлардан бири" деб атади. Президентнинг сўзларига кўра, агар қуруқликдаги операция бошланса, Конгрессга фақат хабар берилади, аммо операция учун алоҳида тасдиқ талаб қилинмайди.
Америка мудофаа вазири Пит Хегсет ҳам Трампнинг баёнотини қўллаб-қувватлаб, ҳар бир ҳужум "илгаридан аниқланган маълумотлар асосида" амалга оширилаётганини билдирди.
Айни вақтда, ҳарбий таҳлилчилар бу қарор АҚШни янги халқаро тангликка олиб кириши мумкинлигини таъкидламоқда.
Венесуэла ҳукумати эса Вашингтоннинг ҳаракатларини "ҳудудий суверенитетга бевосита таҳдид" сифатида баҳолаб, ҳар қандай қуроқликдаги операцияларга қарши жавоб чоралари кўрилишини эълон қилди.
Аввалроқ АҚШ ҳарбий денгиз флоти Кариб денгизи орқали наркотик олиб кетаётган сувости кемасини йўқ қилгани ҳақида хабар берган эдик.
Изоҳлар мавжуд емас