Ўзбекистон, Тошкент - Batafsil.uz. Президент Дональд Трамп Венесуэла устидан тўлиқ назорат ўрнатилганини эълон қилиб, Каракас олдига бир қатор қатъий шартларни қўйди. Эндиликда Венесуэла нефти фақат АҚШга хизмат қилиши, бошқа йирик давлатлар эса минтақадан чиқиб кетиши керак.
Трамп маъмурияти Венесуэланинг вақтинчалик ҳукумати Делси Родригес олдига иккита асосий талабни қўйган.
Улардан биринчиси Хитой, Россия, Эрон ва Куба билан барча иқтисодий алоқаларни узиш ҳамда уларнинг вакилларини мамлакатдан қувиб чиқариш.
Иккинчиси эса нефть қазиб олишда фақат АҚШ билан ҳамкорлик қилиш ва хом ашё сотишда Америкага мутлақ устунлик бериш.
Давлат котиби Марко Рубио ва Сенат аъзоси Рожер Викернинг маълум қилишича, Венесуэланинг қўли қаттиқ сиқилган. Сабаби мамлакатнинг барча нефть танкерлари лиқ тўла ва уларни жўнатиш учун жой қолмаган.
Агар мавжуд заҳиралар сотилмаса, Каракас бир неча ҳафта ичида молиявий инқирозга (банкротликка) юз тутади.
Трампнинг буйруғига кўра, санкцияланган ҳеч бир танкер Венесуэладан чиқарилмайди ёки у ерга киритилмайди.
Трамп 7 январь, сешанба куни кечқурун Венесуэла "вақтинчалик ҳокимияти" АҚШга бозор нархида сотиш учун 30 миллиондан 50 миллион баррелгача нефть топширишини эълон қилди. Энг қизиғи, ушбу савдодан тушган маблағлар шахсан Трамп томонидан "икки халқ манфаати учун" назорат қилинади.
Сенат Қуролли кучлар қўмитаси раиси Рожер Викернинг таъкидлашича, нефть устидан назорат ўрнатиш учун АҚШ қўшинларини Венесуэла ҳудудига киритиш шарт эмас. Назорат денгиздаги блоклаш ва танкерларни бошқариш орқали амалга оширилади.
"Бизнинг мақсад — нефть Куба ёки Хитойга бепул кетишини тўхтатиш ва уни очиқ бозорга чиқариш", — деган Викер.
Эслатиб ўтамиз, АҚШ Президенти Дональд Трамп Венесуэла мухолифати рамзига айланган Мария Корина Мачадога нисбатан муносабатини кескин ўзгартирганди. Уни Венесуэла ҳокимиятида кўрмаётганлигини маълум қилганди.
Изоҳлар мавжуд емас