Ўзбекистон, Тошкент - Batafsil.uz. АҚШ Президенти Дональд Трамп томонидан ташкил этилаётган Тинчлик кенгаши (Board of Peace) атрофидаги воқеалар кутилмаган тус олди. Франция президенти Эммануэль Макрон БМТ мавқеига путур етишидан хавотирланиб, ташкилотга аъзо бўлишдан бош тортгач, Трамп иқтисодий "уруш" эълон қилди.
Дональд Трамп ташаббуси билан ташкил этилаётган, Ғазодаги можарони ҳал қилишга қаратилган Тинчлик кенгашига дунёнинг 60 га яқин давлати таклиф олган. Ушбу халқаро тузилмага доимий аъзо бўлиш учун давлатлардан йирик миқдорда молиявий бадал талаб этилади.
Bloomberg нашрининг Макронга яқин манбаларига таяниб хабар беришича, Франция президенти янги ташкилотнинг низоми Ғазо сектори масалаларидан анча кенгроқ эканидан хавотирда.
Франция "ҳозирги босқичда Америка таклифига ижобий жавоб бериш ниятида эмас". Уларнинг асосий эътирози кенгашнинг ҳаддан ташқари таъсир қилишига асосланган. Франция Ташқи ишлар вазирлиги алоҳида баёнотда БМТ Низомига "самарали кўп томонлама ҳамкорликнинг пойдевори" сифатида содиқлигини яна бир бор таъкидлаган.
Макроннинг фикрича, янги тузилма БМТнинг глобал ролини заифлаштириши мумкин. Кенгашнинг ваколатлари халқаро ҳуқуқ нормаларига мос келмаслиги хавфи бор.
Дональд Трамп француз ҳамкасбининг бу шубҳаларига ўзига хос услубда — иқтисодий босим билан жавоб қайтарди. АҚШ етакчиси агар Франция Кенгашга қўшилмаса, француз виноси ва шампанига 200 фоиз миқдорида бож жорий этишга ваъда берган. Бу Франциянинг экспорт соҳаси учун қақшатқич зарба бўлиши мумкин.
Трамп ўз баёнотида Макрон барибир Ғазони тартибга солиш бўйича Тинчлик кенгаши ишида иштирок этишини таъкидлаган. Кўриниб турибдики, Вашингтон Парижга нисбатан "юмшоқ куч"дан кўра, тўғридан-тўғри босим ўтказиш йўлини танлаган.
Аввалроқ Ўзбекистон Президенти Шавкат Мирзиёев ушбу Кенгашга таъсисчи давлат сифатида қўшилишга тайёрлигини билдирган эди. Бироқ Европа Иттифоқининг етакчи давлатларида, хусусан Францияда бу борада ҳамон иккиланиш ва қаршилик мавжуд.
Изоҳлар мавжуд емас