Ўзбекистон, Тошкент - Batafsil.uz. Яқин Шарқда геосиёсий вазиятнинг кескинлашуви ва нефть нархининг баррел учун 105 доллардан ошиши фонида Саудия Арабистонининг стратегик нефть қувурига ҳужум қилингани ҳақида хабарлар тарқалди, Сурияда эса ёқилғи қимматлашуви сабаб оммавий норозиликлар бошланди.
NASA сунъий йўлдош маълумотларига кўра, Саудия Арабистонидаги "Шарқ-Ғарб" нефть қувури бўйлаб 100 километрлик тутун ва юқори иссиқлик аномалиялари қайд этилган. Айрим таҳлилчилар қувурнинг 6-8 та қисми шикастланганини тахмин қилмоқда, бироқ Saudi Aramco компанияси бу бўйича ҳали расмий баёнот бергани йўқ.
Кунлик ўтказувчанлиги 7 миллион баррелни ташкил этувчи ушбу қувур Саудия Арабистонининг Ҳўрмуз бўғизини четлаб ўтувчи асосий муқобил экспорти йўналиши ҳисобланади. Жорий йилнинг апрель ойида ҳам ушбу инфратузилмага эрон дрони ҳужум қилиб, нефть ташишни вақтинча тўхтатган эди.
Қизил денгиздаги Баб-аль-Мандеб бўғизида ҳусийлар томонидан кемалар қатновига таҳдид солинаётган бир пайтда, стратегик қувурнинг ишдан чиқиши Саудия Арабистонининг экспорт имкониятларини кескин чеклаб қўйиши мумкин.
Параллель равишда, 13 сентябрь куни Суриянинг Ҳалаб, Раққа ва Идлиб вилоятларида ҳукуматнинг ёқилғи нархини кескин ошириш тўғрисидаги қарорига қарши оммавий намойишлар бўлиб ўтмоқда. Мамлакатда дизель ёқилғиси 40 фоизга, бензин эса 26–28 фоизга қимматлашгани ортидан аҳоли йўлларни тўсиб, шиналарни ўт қўйган ва М5 (Ҳалаб-Дамашқ) магистралини ёпиб қўйган.
Эслатиб ўтамиз, Қўшма Штатлар ва Исроилнинг Эронга ҳужуми ортидан бошланган можаро глобал нефть таъминотида кескин инқироз келтириб чиқариб, қора олтин нархини 150 долларгача ошириши кутилганди. Бироқ Хитойнинг ўз захираларини оқилона ишга солиб, импорт ва экспортни қисқартиргани ҳамда ички талабни бошқаргани бозордаги рекорд нархларнинг олдини олган эди.
Бугунги воқеалар яна бир бу инқироз ҳақидаги тахминларни яна кун тартибига чиқарди.
Изоҳлар мавжуд емас