Ўзбекистон, Тошкент - Batafsil.uz. Ўзбекистонда электрон тижорат ва суғурта соҳасини ҳуқуқий тартибга солишни такомиллаштиришга қаратилган янги қонун қабул қилиниб, у билан 10 та қонун ҳужжатига ўзгартиш ва қўшимчалар киритилди.
Қонунга мувофиқ, йўл-транспорт ҳодисаси содир бўлганда жабрланган ҳайдовчилар суғурта товонини олиш учун энди ўз танловига кўра айбдор томоннинг суғурта компаниясига тўғридан-тўғри мурожаат қилиши мумкин бўлади. Бу суғурта тўловларини олиш жараёнини соддалаштириш ва тезлаштиришга хизмат қилиши кутилмоқда.
Ҳужжат билан суғурта соҳасида истеъмолчилар ҳуқуқларини ҳимоя қилишга қаратилган қатор янгиликлар ҳам жорий этилган. Хусусан, мажбурий автосуғурта полисини қоғоз шаклида расмийлаштириш амалиёти бекор қилинган.
Шунингдек, транспорт воситасидан чекланмаган тарзда фойдаланиш учун расмийлаштириладиган мажбурий суғурта полисида автомобил эгаси, умумий мулкдор ва унинг яқин қариндошларини алоҳида кўрсатиш талаби олиб ташланган. Энди уларнинг фуқаролик жавобгарлиги автоматик равишда суғурталанган ҳисобланади.
Бундан ташқари, суғурта компаниялари мижозларга хизмат шартлари, суғурта тўлови миқдори, нархи, шунингдек хизматнинг афзаллик ва эҳтимолий чекловлари ҳақида тўлиқ маълумот беришга мажбур этилади. Шу билан бирга, пруденциал нормативларни бузган ёки тўловга қобилиятсизлик аломатлари мавжуд бўлган суғурта компанияларига фойдани тақсимлаш тақиқланган.
Эслатиб ўтамиз, Ўзбекистонда суғурта агентлари фаолиятини тартибга солувчи янги низом давлат рўйхатидан ўтказилганди. Ҳужжат агентларнинг ҳуқуқ ва мажбуриятлари, шунингдек улар фаолияти устидан назорат тартибини белгилаган эди.
Изоҳлар мавжуд емас