Ўзбекистон, Тошкент - Batafsil.uz. Фарғона вилояти мактабгача ва мактаб таълими бошқармаси бошлиғи Бувайда туманидаги 37-мактаб директори Ҳасанбой Нишоновни меҳнат қонунчилигига зид равишда ишдан бўшатгани учун маъмурий жавобгарликка тортилди. Аввалроқ Давлат меҳнат инспекцияси аралашуви билан директор ўз лавозимига қайта тикланган.
Воқеалар ривожи 37-мактабда ўқитувчиларнинг дам олиш кунлари 24 соатлик навбатчиликка жалб этилгани ҳақидаги хабарлар тарқалишидан бошланган эди. Ўшанда вилоят бошқармаси директорни "ўқитувчиларга ўз хизмат вазифасига кирмайдиган ишларни юклаганлик"да айблаб, ишдан бўшатган эди.
Бироқ кейинчалик навбатчиликни ташкил этиш бўйича топшириқ аслида Мактабгача ва мактаб таълими вазирлигининг тегишли буйруғига асосан берилгани аниқланганди.
Давлат меҳнат инспекцияси томонидан ўтказилган ўрганишлар натижасида директорни ишдан бўшатиш ва янги раҳбарни тайинлаш жараёнида меҳнат қонунчилиги талаблари қўпол равишда бузилганлиги аниқланган.
Ишдан бўшатиш учун асос қилиб олинган важлар ўз исботини топмаган.
Ҳозирда директор Ҳасанбой Нишонов ўз иш жойига тикланган. Ноқонуний буйруқ чиқарган бошқарма бошлиғига нисбатан маъмурий жазо қўлланилган. Расмий баёнотда мансабдор шахснинг исми ва жазонинг аниқ миқдори очиқланмаган бўлса-да, бу ҳолат таълим тизимидаги раҳбарларнинг ўз ваколатларини суиистеъмол қилишига қарши ҳуқуқий чора сифатида кўрилмоқда.
Изоҳлар мавжуд емас