Ўзбекистон, Тошкент - Batafsil.uz. Ўзбекистон Республикаси Миллий статистика қўмитаси аҳоли ва қишлоқ хўжалигини рўйхатга олиш тадбирининг дастлабки натижаларини эълон қилди. Унга кўра, мамлакат аҳолиси сони 39 047 321 нафарни ташкил этган, бу 1989 йилдаги кўрсаткичга нисбатан икки баробар кўпдир.
Мазкур тадбир Президентнинг 2025 йил 19 сентябрдаги ПФ-173-сон Фармонига асосан ташкил этилди ва мамлакатнинг демографик ҳамда ижтимоий-иқтисодий ҳолати бўйича ишончли маълумотлар базасини шакллантиришга хизмат қилади.
Дастлабки натижаларга кўра, аҳолининг 97,3 фоизи рўйхатга олинган. Рўйхатга олиш жараёнида онлайн тизимдан 82,3 фоиз аҳоли фойдаланган бўлса, қолган қисми маҳалла вакиллари томонидан уйма-уй юриб рўйхатга олинган. Жами 55 мингдан ортиқ маҳалла вакиллари жалб этилган тадбир давомида OneID тизимидан фойдаланувчилар сони ҳам кескин ошган. Шунингдек, Ўзбекистонда камида бир йилдан ортиқ истиқомат қилаётган 56,9 минг нафар хориж фуқароси ҳам рўйхатга олинган.
Миллий таркиб бўйича аҳолининг 89,4 фоизини ўзбеклар ташкил этади. Аҳолининг 91,3 фоизи ўзбек тилини ўз она тили сифатида қайд этган. Шунингдек, тожиклар 3,3 фоизни, қорақалпоқлар 2,2 фоизни, қозоқлар 1,8 фоизни, руслар 1,6 ,қирғиз 0,6 фоизни, туркман 0,5 фоизни ташкил этган.
Қишлоқ хўжалиги соҳасида эса экин майдонлари, боғ ва токзорлар ҳамда чорвачиликдаги ўзгаришлар бўйича муҳим статистик кўрсаткичлар аниқланган. Хусусан, деҳқончилик учун фойдаланадиган ер майдонлари 4,8 миллион гектарни ташкил қилган.
Изоҳлар мавжуд емас