Ўзбекистон, Тошкент - Batafsil.uz. Фармацевтика маҳсулотлари хавфсизлиги маркази ботулотоксин сақловчи айрим косметологик маҳсулотлар қўлланилганидан сўнг оғир ножўя ҳолатлар қайд этилгани муносабати билан аҳолини огоҳлантирди. Республика ихтисослаштирилган эпидемиология, микробиология, юқумли ва паразитар касалликлар илмий-амалий тиббиёт маркази клиникасига бу ҳақида кўплаб мурожаатлар келиб тушган.
Маълум қилинишича, айрим беморларда Refinex Botulinum Toxin Type A for Therapy ҳамда Dysport 500 Clostridium botulinum type A toxin-haemagglutinin complex маҳсулотлари косметологик мақсадларда қўлланилганидан кейин оғир ножўя реакциялар, жумладан, ботулизмга хос клиник белгилари кузатилган.
Ҳозирда ушбу маҳсулотларнинг келиб чиқиши ва уларнинг қонуний муомалада бўлган-бўлмагани юзасидан тегишли текширув ишлари олиб борилмоқда. Марказнинг таъкидлашича, мазкур икки маҳсулот Ўзбекистон Республикасида давлат рўйхатидан ўтказилмаган. Шу боис уларнинг хавфсизлиги, сифати ва самарадорлиги белгиланган тартибда баҳоланмаган.
Фуқароларга интернет ва ижтимоий тармоқлар орқали таклиф этилаётган шубҳали маҳсулотларни харид қилмаслик, агар бундай маҳсулотлар сотиб олинган бўлса, улардан фойдаланмаслик, қўллаш бошланган бўлса эса дарҳол тўхтатиб, шифокорга мурожаат қилиш тавсия этилган. Мутахассислар ушбу маҳсулотларни қўллаган шахсларда кўришнинг хиралашиши, қовоқларнинг тушиб қолиши, ютиш қийинлашиши, нутқ бузилиши, мушаклар кучсизлиги, нафас олиш қийинлашиши ёки бошқа ғайритабиий аломатлар пайдо бўлса, зудлик билан тиббий ёрдамга мурожаат қилиш зарурлигини таъкидлаган.
Фармацевтика маҳсулотлари хавфсизлиги маркази аҳолини дори воситалари ва тиббий маҳсулотларни фақат расмий савдо тармоқлари орқали харид қилишга ҳамда шубҳали маҳсулотлар аниқланган ҳолларда ваколатли органларга хабар беришга чақирган. Марказ маълумотига кўра, мазкур ҳолат юзасидан назорат ва ўрганиш ишлари давом эттирилмоқда.
Аввалроқ Instagram тармоғида ўзини таниқли косметолог ва тажрибали жарроҳ сифатида реклама қилиб, аёлларнинг соғлиғига жиддий зиён етказган сохта мутахассис 150 миллион сўм жаримага тортилганди.
Изоҳлар мавжуд емас